Ինչպես մասնագիտանաս, զարգանաս քո ստեղծարար հատվածում, եթե անընդհատ գոյատևման պայքարի մեջ ես. Ոսկանյան

Երաժիշտ Միքայել Ոսկանյանը ֆեյսբուքյան իր էջում գրել է.

«Այսօր Հայաստանում հայկական մշակույթ գրեթե չկա, չի ստեղծվում...պետք չէ ոչ մեկին...անգամ հայալեզու բովանդակությամբ բան ես առաջարկում` խույս են տալիս: Սիրուն հայերենը ծաղրում են, հայկական մշակույթը դրել են «նավթալին» արկղի մեջ ու համարում են ոչ թռենդային, հնացած...

Կա՛մ եվրոպական մշակույթն է հարգի (որը քիչ թե շատ որակյալ է, բայց մեկ է մերը չէ, կրկնօրինակում է), կա՛մ արաբաթրքական անհասկանալի միախառնումն է, ու մեծ գումարների աղբյուրն է...

Ցավում եմ, որ հասել ենք այն կետին, երբ հային հայկական մշակույթը այդքան վանում է, որովհետև ծանոթ չէ, չգիտի...

Երբեւէ այսքան մտատանջված ու հուսալքված չեմ զգացել ինձ...

Հայաստանը դարձել է մի մեծ շուկա, որտեղ միայն առևտուրն է աշխատում, միայն ու գնալով ավելի ակնհայտ է դառնում, որ 100 տարի առաջ մեզ իսկապես ջարդել են, հասել են նպատակին...

Բայց ինչպե՞ս ստեղծվի կամ զարգանա հայկական նոր մշակույթը, արվեստը, եթե պետք է անընդհատ շեղվես շուկայի անգրագետ պահանջների վրա ու պայքարես, որ հայերը իրենցը` հայկականը, հասկանան ու սիրեն։

Ինչպես մասնագիտանաս, զարգանաս քո ստեղծարար հատվածում, եթե անընդհատ գոյատևման պայքարի մեջ ես, քանի որ ամբողջ հայության երևի 5%-ն է ճանաչում իր մշակույթը և սիրում։ Մնացածի գիտելիքները այնքան թերի են, որ կա՛մ եղածն են մերժում, կա՛մ էլ եղածի զարգացումը...»: