Լրագրողի և նախարարի միջև տեղի ունեցած դեպքի առթիվ նշանակվել է դատաբժշկական փորձաքննություն․ փաստաբան

Լրագրող Փայլակ Ֆահրադյանի և ԲՏԱ նախարար Հակոբ Արշակյանի միջև տեղի ունեցած դեպքի առթիվ նշանակվել է դատաբժշկական փորձաքննություն։ Այս մասին NEWSPRESS.am-ի հետ զրույցում ասաց Փայլակ Ֆահրադյանի փաստաբան Սոսե Չանդոյանը։

Նա տեղեկացրեց, որ Կենտրոնի ոստիկանություն հանցագործության վերաբերյալ արդեն հաղորդում են տվել, ներկայացրել են ձեռքի տակ եղած բոլոր ապացույցները՝ տեսանյութեր, նկարներ, որոնք հավաստում են մարմնական և գույքային վնասները: Այստեղից էլ գործի նյութերը կուղարկվեն Հատուկ քննչական ծառայություն, քանի որ ոտնձգություն կատարողը պաշտոնատար անձ է։

Նա նկատում է, որ Փայլակ Ֆահրադյանը պահպանել է լրագրողական էթիկայի նորմերը։ «Լրագրողը նախարարին  ուղղել է հանրությանը հետաքրքրող հարցերից մեկը ու արժանացել խիստ ագրեսիվ վերաբերմունքի: Նախարարը կարող էր օգտվել հարցերին չպատասխանելու իր իրավունքից, բայց դրսևորել է պաշտոնատար անձին ոչ հարիր պահվածք, սպառնացել լրագրողին, վիրավորել նրան և հարձակվել լրագրողի վրա»,-ասաց Սոսե Չանդոյանը։

Նա նշեց նաև, որ նախարար Արշակյանը նաև կոպիտ վերաբերմունք է ցուցաբերել լրագրող Տաթև Այվազյանի նկատմամբ, ով այդ պահին փորձել է պաշտպանել գործընկերոջը։

Ինչ վերաբերվում է շրջանառվող այն տեղեկություններին, թե Փայլակ Ֆահրադյանը սադրել ու հայհոյել է, ապա փաստաբանը վստահեցնում է, որ դրանք դրանք իրականության հետ որևէ աղերս չունեն:Սոսե Չանդոյանը կրկնեց, որ լրագրողի գործողությունները եղել են օրինական, իսկ նախարարը կատարել է ՀՀ քրեական օրենսգրքով պատժելի արարք:

Լրագրողի կողմից հայհոյանքների մասին տեղեկությունները, ըստ փաստաբանի, ունեն այլ նպատակ․ «սևացնել լրագրողին և փորձել ինչ-որ ձևով արդարացնել նախարարի խայտառակ պահվածքը»,- ասաց նա և հավելեց, որ արդեն նշանակվել է դատաբժշկական փորձաքննություն։