ՔՈԱՖ-ը, Դեբետի համայնքապետարանն ու «Գրադարակ գրադարաններ» ՀԿ-ն հիմնում են ժամանակակից գրադարան Դեբետ գյուղում

«Հայաստանի մանուկներ» բարեգործական հիմնադրամը (ՔՈԱՖ), Դեբետի համայնքապետարանը եւ «Գրադարակ գրադարաններ» հասարակական կազմակերությունը, որ ժամանակակից գրադարաններ է կառուցում Հայաստանի ու Արցախի գյուղական համայնքներում, ՔՈԱՖ-ի երեւանյան գրասենյակում ստորագրեցին համագործակցության հուշագիր։

Այս եռակողմ համագործակցության արդյունքում Լոռու մարզի Դեբետ գյուղի համայնքապետարանի շենքի 2-րդ հարկում կհիմնվի բազմաֆունկցիոնալ, ժամանակակից գրադարան, որը բացի զուտ գրադարան լինելուց, նաեւ կլինի սեմինարների, աշխատարանների ու տարբեր միջոցառումների անցկացման հարմարավետ վայր։

Նոր գրադարանը հիմնվում է ՔՈԱՖ-ի «ՍՄԱՐԹ Դեբետ» նախաձեռնության շրջանակներում, որը հավակնում է դառնալ գյուղական համայնքի համապարփակ զարգացման օրինակելի մոդել։ 

«Մեր ՍՄԱՐԹ Դեբետ» նախաձեռնության արդյունքում Դեբետն ամբողջությամբ տրանսֆորմացնում ենք ՍՄԱՐԹ գյուղի, եւ, վերափոխելով համայնքապետարանի շենքը, չէինք կարող այնտեղ չկառուցել 21-րդ դարի գրադարան, որի առկայությունը պարզապես անհրաժեշտություն է յուրաքանչյուր համայնքի համար։ Ավելին՝ գրավիչ գրադարանը կապահովի նաեւ համայնքի բնակիչների ավելի մեծ հոսք դեպի համայնքապետարան, ինչը շատ կարեւոր է։

Այս նախագծի շրջանակներում կարեւորում ենք համագործակցությունը հենց «Գրադարակ գրադարաններ» ՀԿ-ի հետ, որն ունի գյուղական համայնքներում ժամանակակից գրադարաններ կառուցելու առաքելություն եւ փորձ»,- նշում է ՔՈԱՖ-ի գործադիր տնօրեն Կորյուն Խաչատուրյանը։

Գրադարանը, որ կզբաղեցնի 100քմ տարածք, կունենա փոքրիկ սենյակ՝ լռության պայմաններում աշխատելու կամ ուսանելու համար, ինչպես նաեւ ավելի խոշոր սրահներ միջոցառումների եւ հանդիպումների համար։ 

«Այս պահին էլ համայնքապետարանում գործող գրադարանից օգտվողներ կան, բայց այն քիչ մոտիվացնող է, եւ գրքերի վիճակն էլ շատ լավ չէ, իսկ նոր գրադարանն իր գրավչությամբ, գրքերի տեսականիով կմեծացնի մարդկանց հոսքը դեպի գրադարան»,- նշում է Դեբետի համայնքապետ Աշոտ Ղազարյանը։

Գրադարանը, որ նախատեսված է միաժամանակ 3-6 տարեկան երեխաների, 7-17 տարեկան դպրոցականների ու 18-ից բարձր անձանց համար, հագեցած է լինելու անհրաժեշտ սարքավորումներով՝ համակարգիչ, պրոյեկտոր, էկրան, բարձրախոսներ, խոսափող, յուրահատուկ ու հարմարավետ կահույք։ Գրքերի քանակն աստիճանաբար կաճի՝ 400-ից հասնելով մինչեւ 4000 անուն գիրք։ Հասանելի կլինեն նաեւ սեղանի խաղեր։

«Այս համագործակցությունը կարեւորում ենք երկու հիմնական պատճառով. նախ, ուրախ ենք, որ մուտք ենք գործում մի նոր համայնք ու այսուհետ կարող ենք Լոռու մարզի ավելի շատ բնակիչների սպասարկել, եւ բացի այդ, սա նաեւ շահույթ չհետապնդող կազմակերպությունների միջեւ արդյունավետ համագործակցության հաջող փորձ է։ Հանուն ավելի լավ Հայաստանի մեր ուժերի համախմբումը պետք է բոլորիս համար
առաջնահերթություն դառնա»,- ընդգծում է «Գրադարակ գրադարաններ» ՀԿ-ի համահիմնադիր-տնօրեն Արուսիկ Զեյնալյանը։

Նախագծի արժեքը կազմում է 40,000 ԱՄՆ դոլար։ Գրադարանի կառուցման եւ կահավորման բոլոր ծախսերը հոգում է ՔՈԱՖ-ը, «Գրադարակ գրադարաններ» ՀԿ-ն ապահովելու է հաստատության շարունակական ու սահուն գործառնությունը՝ այդ թվում գրադարանավարի մեկ հաստիքի ապահովումը, որը կհամալրվի տեղաբնակ մասնագետի կողմից։ Իսկ Դեբետի համայնքապետարանն էլ ապահովելու է գրադարանի շաբաթական 7 օր հասանելիությունն ու հոգալու է գործառնական ծախսերի մի մասը։