Անդրանիկ Քոչարյանին լսելը կհանգեցնի ինտելեկտուալ հյուծման, իսկ նրան պատասխանելը՝ հոգեկան խանգարման. Գեւորգ Կոստանյան. News.am

ՀՀ նախկին դատախազ Գևորգ Կոստանյանը Հայաստան կվերադառնա այն օրը, երբ իր նկատմամբ հետախուզումը դադարեցվի։ Այս մասին այսօր՝ մարտի 16-ին, NEWS.am-ի հետ զրույցում ասաց Գեւորգ Կոստանյանը։

Նշենք, որ այսօր ԱԺ անկախ պատգամավոր Թագուհի Թովմասյանը հրապարակել է փաստաթուղթ այն մասին, որ Գեւորգ Կոստանյանի գործն Ինտերպոլը համարել է քաղաքական եւ մերժել է նրա հետախուզման հարցում համագործակցել Հայաստանի Հանրապետության հետ։

«Ստացվում է այնպես, որ ամբողջ աշխարհը, բոլոր երկրները համարում են, որ Կոստանյան Գեւորգի նկատմամբ իրականացվում է ապօրինի եւ անհիմն քաղաքական բնույթի քրեական հետապնդում, այդ բոլոր երկրները հրաժարվել են իմ նկատմամբ հետապնդում իրականացնել, բացի Հայաստանի Հանրապետությունից։ Հետեւաբար, սրա հիման վրա մեխանիկորեն պետք է հետախուզումը հանվի։ Անկախ այս ինտերպոլի գրությունից՝ ես բազմիցս հայտարարել եմ երկու բան։ Առաջինը, ասել եմ՝ թող գոնե մեկ ապացույց ներկայացնեն, ես կընդունեմ դա։ Երկրորդը, թող հրապարակային խորհրդակցության հրավիրեն, ես գամ, հրապարակային քննարկենք։ Մեկ ապացույց հայտարարեն, ոչ թե հիմնավորեն, որ ես մեղավոր եմ, ես կընդունեմ»,– ասաց նա։

Գեւորգ Կոստանյանը շեշտեց, որ Հայաստանը խուսափում է իր նկատմամբ հետախուզումը դադարեցնել, որովհետեւ գիտեն այդ ամենի հետեւանքները։

Հարցին՝ եթե Ինտերպոլը, ըստ էության, «Մարտի 1-ի» գործը համարում է քաղաքական է, ի՞նչ հետեւանքներ են լինելու, Կոստանյանը պատասխանեց. «Ինտերպոլը հաստատեց՝ բոլոր այն իրավաբանները՝ դատախազ, քննիչ, թե դատախազ, ովքեր այս գործով զբաղվել են, զբաղվել են քաղաքական հետապնդմամբ։ Հետեւանքն այն է, որ բոլորը դատվելու են մեխանիկորեն»։

Ճշտող հարցին՝ եթե այդ գործով դատավորն ինքնաբացարկ է հայտնել, ապա պատասխանատվություն չի՞ կրելու, նախկին դատախազն արձագանքեց. «Նա փրկվեց. խնդիրն այն է, որ նա չի քննել եւ չի հաստատել նախաքննության մարմնի ու դատախազության կեղծիքը։ Երբ դատավորը որոշում է կալանքը կամ հետախուզումը թողնել ուժի մեջ, նա մեխանիկորեն հաստատում է քննիչի եւ դատախազի ապօրինությունները»։

Անդրադառնալով վարչապետ Նիկոլ Փաշինյանի այն հայտարարությանը, թե «Մարտի 1-ի» սպանությունների ֆոնը բացահայտված է՝ Գեւորգ Կոստանյանն ասաց. «Նիկոլ Փաշինյանը 2018 թվականին հայտարարում էր, որ Մարտի 1-ի գործը բացահայտված է։ Մենք այս ընթացքում բացատրեցինք, որ նա ստում է, Մարտի 1-ը բացահայտված չէ, որովհետեւ նա առնվազն պետք է պատասխան տա, թե ով է սպանել 10 տղաներին։ Վերջին հանրահավաքին նա փորձեց իրեն ուղղել եւ հայտարարեց՝ իմ կարծիքով Մարտի 1-ի գործի ֆոնը բացահայտված է։ Նա արդեն հրաժարվեց իր խոսքերից՝ հասկանալով, որ կեղծիք է անում»։

Հարցին՝ եթե իր նկատմամբ հետախուզումը հանվի, ինքը կգա՞ Հայաստան, Կոստանյանը պատասխանեց՝ միանշանակ։

Հարցին, իր կարծիքով, Ինտերպոլի այդ փաստաթղթի պարագայում իր նկատմամբ հետախուզումը կդադարեցվի՞, Կոստանյանը պատասխանեց՝ ոչ. «Որովհետեւ այս գործով զբաղվող ո՛չ Գլխավոր դատախազը, ո՛չ ՀՔԾ պետը, ո՛չ գործով զբաղվող քննիչը կամ դատախազը այդքան գրագիտություն չունեն»։

Անդրադառնալով իմքայլական պատգամավոր Անդրանիկ Քոչարյանի այն խոսքին, որ եթե Գեւորգ Կոստանյանը գա Հայաստան եւ պատասխանի «Մարտի 1-ի» հետ կապված մի շարք հարցերի, ապա ՀՔԾ պետ Սասուն Խաչատրյանն իրեն ձեռքերը բաց կընդունի, Կոստանյանն արձագանքեց.

«Անդրանիկ Քոչարյանին լսելը կամ մեկնաբանելը կհանգեցնի ինտելեկտուալ հյուծման, իսկ նրան պատասխանելը՝ հոգեկան խանգարման»։

Հիշեցնենք, որ այսօր Թագուհի Թովմասյանը հրապարակել է միջազգային հեղինակավոր քրեական ոստիկանության՝ «Ինտերպոլի» մի փաստաթուղթ, որն ուղղված է ՀՀ Ինտերպոլի ազգային բյուրոյին, որում մասնավորապես, ասվում է. «Խնդրում ենք հաշվի առնել, որ իրավաբանական փորձաքննությունից հետո գլխավոր քարտուղարությունը եկել է այն եզրակացության, որ հետախուզվող անձի մասին ծանուցումը չի չի համապատասխանում ինտերպոլի կանոնադրության 3-րդ հոդվածին»: Իսկ այդ հոդվածում ասվում է. «Կազմակերպությանը խստորեն արգելվում է ձեռնարկել քաղաքական, ռազմական, կրոնական, ռասայական բնույթի որեւէ միջամտություն: Հետեւաբար համապատասխան ծանուցում չի ուղարկվել եւ այդ անձի վերաբերյալ տեղեկությունը՝ Ինտերպոլի դեռեւս 2020-ի ապրիլի 4-ին տվյալների բազայից հանվել է»:

Ինտերպոլը կոնկրետ դեպքով մերժել է նաեւ Հայաստանի հետ համագործակցել։ Ինտերպոլի գլխավոր քարտուղարությունը կոչ է արել Հայաստանի իրավապահներին անձի նկատմամբ չօգտագործել Ինտերպոլի խողովակները եւ չպահանջել նրա հետախուզումը։

Պատգամավորը հրապարակել է նաեւ երկրորդ փաստաթուղթը, որով Ինտերպոլի գլխավոր քարտուղարությունն իր բոլոր երկրներում գտնվողն ստորաբաժանումներին, որպեսզի Գեւորգ Կոստանյանի վերաբերյալ տվյալները հանվեն Ինտերպոլի բազայից: Այդ երկրորդ փաստաթղթում նշվում է, որ Ինտերպոլի քարտուղարությունը մերժել է Ինտերպոլի հայաստանյան բյուրոյիկողմից Գեւորգ Կոստանյանի կողմից հայցված կարմիր ծանուցագիրը: