Լարվածության աստիճանը հասել է իր գագաթնակետին. Սեյրան Օհանյան

Լարվածության աստիճանը հասել է իր գագաթնակետին: Կրակում են ոչ միայն հրաձգային զենքերից, այլև՝ ականանետերից:

Այս մասին լրագրողների հետ զրույցում հայտարարեց ՀՀ Պաշտպանության նախարար Սեյրան Օհանյանը:
Նրա խոսքով մեծ քանակությամբ կրակոցներ են եղել: Արցախի Հարավ-արևելյան հատվածում կրակել են նաև տանկից. «կրակոցները դիպուկ չեն եղել: Սա հակառակորդի կողմից իրավիճակի ապակայունացման մարտավարություն է»,- ասաց Սեյրան Օհանյանը:

Նա նշեց, որ ադրբեջանական կողմի քայլը կարող է պատճառ լինել ոչ միայն արտաքին քաղաքական հարցերի, այլև՝ ներքաղաքական խնդիրների արդյունք:

«Երկու նախագահների հանդիպումը կարող է լինել պատճառ, մեր տարածաշրջանի շուրջ Մերձավոր Արևելքում տիրող իրավիճակը, որը շատ դեպքերում հասնում է մեր սահմաններին: Մեր դիրքապահներն անձնուրաց գործողությունների շնորհիվ իրավիճակը վերահսկում են: Ուզում եմ, որ մեր ժողովուրդը վստահ լինի, որ զսպման մեխանիզմներ ձևավորել ենք»,- շեշտեց նախարարը:

Նա նշեց, որ եկել է ժամանակը, որ միջազգային հետաքննության անցկացման մեխանիզմների ձևավորման համար պետք է լուրջ աշխատանք տարվի, որպեսզի թիրախային գնահատականներ տրվեն: Թեև նախարարը նկատեց նաև, որ ադրբեջանական կողմն, ամեն դեպքում, մարդկային պարզ հարաբերությունները չի հասկանում:

«Նայեք, օլիմպիական խաղերի ժամանակ, Մելի Մեջլիսի ընտրությունների ժամանակ, մենք զսպվածություն դրսևորել ենք, ոչ մի խախտում չի եղել, բայց մեր հանրաքվեն չորս-հինգ օր է լարվածության աստիճանի բարձրացման պատճառ է դարձել: Դա է պատճառը, որ շատ հրամանատարներ չեն կարողացել դիրքերից իջնել, սահմանադրական պարտքը կատարել, որովհետև սահմանը լարված է եղել»,- շեշտեց նա:

Ինչ վերաբերում է ԱԱԾ-ի կողմից ձերբակալված հայ սպային, ով գաղտնի տեղեկություններ էր հաղորդել Թուրքիային, ապա Օհանյանն ասաց.
«Հիմա համապատասխան աշխատանքներ են տարվում, հիմա կոնկրետ, ավելի ստույգ, տեղեկություններ կարող է տալ ԱԱԾ-ն: Այդ սպան մեկ տարուց ավելի է Զինված ուժերում չի ծառայում, ինքն իրեն չի կարողացել դրսևորել գրագետ, և դրա համար նա իր անձնական կամքով զորացրվել է»,- նշեց պաշտպանության նախարարը: