Այդ սպան մեկ տարուց ավել է, չի աշխատում Զինված ուժերում. Սեյրան Օհանյանը` ձերբակալված սպայի մասին

«Սպան ձերբակալվել է Ազգային անվտանգության աշխատակցի կողմից: Այդ սպան մեկ տարուց ավել է, չի աշխատում Զինված ուժերում»,- այս մասին այսօր` դեկտեմբերի 9-ին, Ազգային ժողովում լրագրողների հետ զրույցում ասաց Պաշտպանության նախարար Սեյրան Օհանյանն` անդրադառնալով դեկտեմբերի 4-ին Արմավիրի մարզի բնակիչ, պահեստազորի մայոր Գարիկ Մարությանի ձերբակալությանը:

Սեյրան Օհանյանի խոսքով` սպան չի կարողացել որպես գրագետ, նորմալ հրամանատ դրսեւորվի եւ իր կամքով զորացրվել է: Պաշտպանության նախարարը չի մանրամասնել նրան ձերբակալելու պատճառը:

Հիշեցնենք, որ Հայաստանի Հանրապետության Ազգային անվտանգության ծառայության կողմից իրականացված համալիր օպերատիվ-հետախուզական միջոցառումների ընթացքում, ստացված օպերատիվ տվյալների իրացման արդյունքում, 2015թ. դեկտեմբերի 4-ին ձերբակալվել է Հայաստանի Հանրապետության քաղաքացի, Արմավիրի մարզի բնակիչ, պահեստազորի մայոր՝ Գարիկ Խաչիկի Մարությանը, ծնվ. 1977., որը երկար տարիներ զբաղեցնելով ՀՀ ՊՆ տարբեր զորամասերի հետախուզության պետի պաշտոններ, համացանցային սոցիալական կայքերի միջոցով կապ է հաստատել Թուրքիայում գործող ադրբեջանական հատուկ ծառայությունների հետ եւ վարձատրության դիմաց նրանց փոխանցել ծառայության բերումով իրեն հայտնի դարձած, այդ թվում՝ պետական գաղտնիք պարունակող տվյալներ:

Հարուցվել է քրեական գործ Հայաստանի Հանրապետության քրեական օրենսգրքի 299-րդ հոդվածի 1-ին մասի հատկանիշներով եւ Գ. Մարությանին առաջադրվել մեղադրանք պետական դավաճանության համար: Կատարվում է նախաքննություն: