Հարևան Իրանում խոզագրիպի համաճարակ է. կա տարածման վտանգ

H1N1 գրիպի համաճարակը 28 մարդու կյանք է խլել Իրանի Քերման նահանգում, իսկ 5-ը մահացել են Բելուջիստան և Սիստան նահանգներում: Իրանի առողջապահության նախարարությունը զգուշացրել է, որ վարակը կարող է տարածվել երկրի մյուս նահանգներում, այդ թվում` Թեհրանում:
Newspress.am-ին Առողջապահության նախարարության հիվանդությունների վերացման և կանխարգելման ազգային կենտրոնի օդակաթիլային և հատուկ վտանգավոր վարակների բաժնի պետ Լիանա Թորոսյանն ասաց, որ H1N1-ը կամ խոզագրիպը առաջվա համաճարակային ներուժը չունի, ինչ 2009թ-ին էր: Դրանից հետո մարդկանց օրգանիզմն ի զորու է պայքարել խոզագրիպի դեմ, ունի պաշտպանական ներուժ:

Ըստ նրա, Առողջապահության համաշխարհային կազմակերպությունը խոզագրիպի համաճարակի վերաբերյալ ահազանգ չի ներկայացրել, նախ և առաջ դա սովորական սեզոնային գրիպ է:
Ինչ վերաբերում է խոզագրիպի դեմ պայքարին, ապա նշեց, որ կիրառվում է գրիպի կանխարգելիչ պատվաստանյութ, որը նախատեսված է երեք տեսակի գրիպի դեմ, ներառյալ խոզագրիպի: Ցանկացողները կարող են համաբուժարաններում անվճար հիմունքներով պատվաստվել:

Մասնագետը կրկին անգամ հորդորեց սուր շնչառական վարակների կամ գրիպի ախտանշանների դեպքում ինքնաբուժությամբ չզբաղվել, քանի որ հաճախ կարելի է շփոթել գրիպը ՍՇՎ-ների հետ. վերջինս 3-4 օր է տևում՝ հարբուխով, անցնում է «ոտքի վրա», իսկ գրիպի դեպքում հնարավոր են բարդություններ, մինչև 40 աստիճան ջերմություն, իսկ հարբուխը դեռ գրիպ չէ:

Նա կրկին հիշեցրեց, որ պետք չէ տեղի անտեղի հակաբիոտիկներ ընդունել հարևանի, բարեկամի կամ դեղատան աշխատակցի խորհրդով, քանի որ հակաբիոտիկները վիրուսի դեպքում կիրառելի չեն. հակաբիոտիկները կիրառում են, երբ գրիպի բարդության ընթացքում վիրուսին միանում է մանրէն :

Լիաննա Թորոսանը տեղեկացրեց, որ ՀՀ առողջապահության նախարարությունը դիվանագիտական խողովակներով դիմել է Իրանին, որպեսզի ԻԻՀ-ի համապատասխան կառույցները կամ հաստատեն, կամ բացառեն, կամ ներկայացնեն պարզաբանումներ խոզագրիպի իրավիճակի վերաբերյալ:
ԱՆ-ը դիմել է նաև Առողջապահության համաշխարհային կազմակերպության եվրոպական տարածաշրջանային կենտրոնին՝ Իրանում խոզագրիպի իրավիճակի մասին տեղեկություններ ստանալու համար: