Սա սպառնալիք էր և ուղղված էր բանակցային գործընթացի վիժեցմանը. Ռուբեն Մեհրաբյան

Այն, ինչ տեղի ունեցավ ԼՂՀ և Ադրբեջանի առաջնագծում, մարտահրավեր էր ուղղված միջազգային հանրությանը:
newspress.am-ի հետ հարցազրույցում ասաց քաղաքագետ Ռուբեն Մեհրաբյանը, անդրադառնալով հակառակորդի կողմից հրասայլից (տանկ) արկակոծմանը:

«Այն, որ Ադրբեջանը զինադադարից հետո առաջին անգամ է տանկից կրակ բացում, անմիջական մարտահրավեր էր Մինսկի խմբին, քանի որ ուղղակիորեն խախտում է հրադադարի համաձայնագիրը»,-ասաց քաղաքագետը:

Նրա խոսքով` հաշվի առնելով, որ այս ամիս պետք է տեղի ունենար Հայաստանի և Ադրբեջանի նախագահների հանդիպումը, սա պարզապես քայլ էր ձեռք բերված հանդիպման պայմանավորվածությունը վիժեցնելու համար:

«Սա սպառնալիք էր և ուղղված էր բանակցային գործընթացի տապալմանը»,- ասաց newspress.am-ի զրուցակիցը:

Ռուբեն Մեհրաբյանի դիտարկմամբ, այս պարագայում, միջազգային հանրությունը պետք է կոշտ քաղաքականություն վարի Ադրբեջանի նկատմամբ:

«Կարծում եմ միջազգային հանրությունը պետք է ճնշումներ գործադրի և խիստ վերաբերմունք ցուցադրի պաշտոնական Բաքվի նկատմամբ»,- ասաց քաղաքագետը:

Ինչ վերաբերում է հայկական կողմի անելիքներին, ապա Ռուբեն Մեհրաբյանը նկատեց, որ Հայաստանը պետք է դիվանագիտական քայլեր ձեռնարկի:

«Հայաստանը պետք է փաստաթղթավորի և միջազգային հանրությանը ներկայացնի խնդիրը` պահանջելով ադեկվատ վերաբերմունք, քանի որ Ադրբեջանը խախտել է հրադադարի պայմանագիր: Հայկական դիվանագիտությունը շատ լուրջ քայլեր ունի անելու, որը պետք է չուշացնի»,- եզրափակեց քաղաքագետը:

Հիշեցնենք, որ երեկ երեկոյան հակառակորդը Հրավային ուղղությամբ առաջին անգամ հրասայլից կրակահերթ է բացել հայկական կողմի ուղղությամբ: