Սյունիքում փորձում են կարգավորել նռան և արքայանարնջի իրացումը

Սյունիքի մարզում այս տարի ստացել են արքայանարնջի և նռան բարձր բերք, սակայն մարզում իրացման հետ կապված խնդիրներ կան, հիմնականում նշում են Վրաստանից մեծաքանակ արքայանարնջի ներկրման փաստը:

Newspress.am-ի հետ զրույցում Սյունիքի մարզպետարանի գյուղվարչության պետ Սամվել Թանգյանը նշեց, որ որոշ ժամանակ առաջ իրոք խնդիր էր առաջացել, մարդիկ ունենալով բարձր բերք անհանգստացել էին, որ չեն կարողանում իրացնել, դիմել էին նաև իրենց:

«Իրացման խնդիր էր առաջացել, փորձեցինք կանոնակարգել իրացումները, մարդիկ բերքի մի մասը պահեցին սառնարանային տնտեսություններում, որոնք միայն անհատական են, հիմնականում նկուղային հարկերում, մյուս մասը վաճառեցին»,- ասաց նա, հավելելով, որ մարզում բերքը իրացնելու համար անհրաժեշտ է մեծածավալ սառնարանային տնտեսություն, նաև պահածոների գործարան:
Ս. Թանգյանը արքայանարնջի և նռան ծավալների վերաբերյալ որևէ թիվ չներկայացրեց, միայն հաղորդեց, որ բերքն առատ է, իսկ թե ինչու չեն արտահանում Իրան, նշեց, որ արտահանման համար փաստաթղթեր ու ձևակերպումներ են անհրաժեշտ, լիցենզիա, որն արդարացված կլիներ 30-40 տոննայի դեպքում, իսկ 2-3 տոննայի պարագայում անիմաստ է:

Ըստ նրա, հանրապետության մարզերից գալիս են Սյունիք նուռ և արքայախնձոր տանելու, իրացման խնդիրը կարգավորվում է.«Արդեն 10-15 օր է իրացման վերաբերյալ ահազանգեր չունենք»: