Ասում եք՝ ամենահարուստ դատավորների սանդղակում ԲԴԽ նախագահը 3-րդն է․ վերջին 3 տարում դարձա՞վ․ ումի՞ց ինչ ենք ուզում․ Հովսեփյանը՝ իշխանությանը․ VIDEO

Երեք օր շարունակ պատգամավորները, օրակարգից շեղվելով, քննարկում են ԲԴԽ նախագահին՝ մինդեռ ԱԺ օրակարգում Վճռաբեկ դատարանի դատավորի թեկնածուների հարցն է։ 

Նախկին իմքայլական, այժմ արդեն անկախ պատգամավոր Սոֆյա Հովսեփյանը նկատեց, որ ի՞նչ ընտրություն պետք է կատարեն, եթե թեկնածուների մասին հարցեր ուղղելու և նրանց բացահայտելու փոխարեն, արդեն 3 օր է քննարկում են Վարդազարյանին։

«Ես պետք է հենց ձեզնից լսեի հարցեր՝ ուղղված այդ թեկնածուներին, որոնց պատասխաններից հետո արդեն կատարեի ընտրություն»,-ասաց Հովսեփյանը։

Պատգամավորի խոսքով, իրենք պետք է ընտրություն կատարեն այն բնակիչների համար, որոնք երազում են արդարադատություն և արդեն 2.5 տարի միայն խոսվում է դատական բարեփոխումների մասին, ուրիշ ոչինչ։

«Խոսեցինք այդ ամենի մասին, բայց մինչ այս պահը դեռ ոչինչ արված չէ։ Թեկնածուները խոսում են դատական համակարգի անկախության մասին, բայց խնդիրը լուծված չէ։ Ե՛վ մուրճը, և՛ մանգաղը եղել է իշխանության ձեռքում, և մենք կարող էինք այդ հարցը լուծել»,- նկատեց նա։

Ըստ Սոֆյա Հովսեփյանի, ԲԴԽ նախագահն էլ նշանակվել է դատարանների վրա վերահսկողություն կատարելու համար, և դա էլ արվել է արդարադատության համար։

«Ինչպիսի՞ ընտրություն է եղել. ԲԴԽ նախագահի վերաբերյալ ձեր հայտարարություններից հետո պարզ է, թե ինչպիսին էր այդ ընտրությունը, բայց այդ ընտրությունն էլ է նեղել այս իշխանությունների օրոք։ Ասվում է, որ ամենահարուստ դատավորների սանդղակում Ռուբեն Վարդազարյանը երրորդն է։ Վստահ եմ, որ վերջին 3 տարում չի դարձել ամենահարուստներից մեկը։ Դուրս է գալիս, որ այն արժեքները, որոնք մենք էինք որդեգրել, բաց ենք թողել։ Մեզ խաբել են։ Ումի՞ց ինչ ենք ուզում։ Ես ուզում էի, որ այսօր հարցերի միջոցով այս թեկնածուներից մեկին ընդունեի և ընտրեի։ Բայց ես այդ հնարավորությունը չունեմ, քանի որ դուք թե՛ հարցերով, թե՛ ելույթներով անդրադարձաք Վարդազարյանին»,- նկատեց Սոֆյա Հովսեփյանը։