Կառավարությունը չի աջակցում հայ մեղվաբույծներին

Կոտայքի մարզի Բջնի համայնքում տիկին Սինարետա Ամիրաղյանը արդեն 45 տարի զբաղվում է մեղվաբուծությամբ, այժմ ունի շուրջ 60 փեթակ, այս տարի ստացել է շուրջ 1 տոննայից ավել մեղր, ցանկանում է նաև արտահանել, սակայն հնարավոր չէ:

Newspress.am կայքին տիկին Սինարետան ասաց, որ Եվրամիությունը մեղվաբույծներին տվել է տեղեկատվական թերթիկներ, որտեղ նշված են, թե ինչ չափանիշներով պետք է առաջնորդվել մեղրի արտահանումը դեպի եվրոպական երկրներ իրականացնելու համար:

«Մեր մեղրը բարձր որակ ունի, սակայն մեղրի մեջ եվրոպացիները պահանջում են մեկ ֆերմենտ՝ դիաստազա, որը մեղրը քամելու ընթացքում մասամբ անհետանում է», – ասաց նա, հիշեցնելով, որ դիաստազան ֆերմենտը վիտամին է, որը օրգանիզմի համար կարևոր նշանակություն ունի:

Նշենք, որ դիաստազայի քանակով է որոշվում, արդյոք մեղրն անարատ է, թե ոչ: Եթե մեղրի մեջ դիաստազայի քանակը բարձր է, դա նշանակում է, որ էկոլոգիապես մաքուր է. հենց այս պահանջն է դրվում հայ մեղվաբույծների առջև:

«Բայց մեղրի մեջ ավելի լավ ֆերմենտներ կան, որը բավարար է որակյալ մեղրի համար: Օրինակ, մենք միշտ ընդունել ենք, որ, եթե մեղրը բյուրեղացավ (ավանդական մեթոդ է ստուգելու համար), ուրեմ մաքուր է, եթե ոչ, ուրեմն որակը ցածր է: Բայց մեղրի որակը որոշում է միայն լաբորատոր ստուգումը», – ասաց նա:

Հայաստանում ԵՄ չափանիշների համապատասխանությունը ստուգելու համար չկա լաբորատորիա, նման սարքավորումներ կան Վրաստանում:

«Մեր լաբորատորիաները ԵՄ չափանիշնեը ստուգելու սարքավորումներ չունեն»,- հավելեց տիկին Սինարետան:

Արտերկրում բնակվող ծանոթ-բարեկամները հաճախ են դիմում տիկին Սինարետային մեղր գնելու համար, այնպես որ մեղրը տանում են, սակայն նա դա չի գնահատում որպես արտահանում:

Իսկ թե ինչու է դիաստազա ֆերմենտի քանակությունն այդքան քիչ հայկական մեղրի մեջ, տիկին Սինարետան նշեց, որ մեր բնությունը աղտոտված է, գետն են լցնում տարբեր տեսակի թունավոր նյութեր ու թափոններ, քիմիական բուժումներ է կատարվում: Ծաղկման շրջանում, երբ մեղուները ծաղիկներից նեկտար են հավաքում՝ այգետերերը թունաքիմիկատներով բուժումներ են կատարում, իսկ մեղվաբույծները դեղորայքային միջոցներով պայքարում են մեղվի հիվանդությունների դեմ: Այնպես որ կամա-ակամա ստացվում է եվրոպական չափանիշներին ոչ համապատասխան մեղր, իսկ հիվանդությունների դեմ եվրոպացիներն առաջարկում են դեղաբույսերով պայքարել: Աղտոտված բնության դեմ պայքարել, իհարկե, չեն կարող:

Տիկին Սինարետան նաև նշեց, որ ողջ աշխարհում, նաև Հայաստանում ինքը տեղյակ է, որ մեղուների քանակը պակասում է, քանի որ էապես ավելացել են ռադիոալիքներ արձակող սարքավորումները:

Նշենք, որ հայկական մեղրը նախատեսվում էր արտահանել դեևս 2013թ-ից: Այն, որ ԵՄ դռները բաց են հայկական մեղրի առջև խոսվում էր կառավարական մակարդակով: Նույնիսկ ասվում էր, որ արտահանման հետ կապված աշխատանքները ԵՄ-ի հետ արդեն իսկ ավարտական փուլում են: Նախատեսվում է, որ հայկական մեղրի արտահանումը եվրոպական երկրներ հնարավոր կլինի իրականացնել 2014 թվականի սկզբից: