Ռուսաստանը աքցանի մեջ է վերցնում Թուրքիային

Նոյեմբերի 24-ին ռուսական ինքնաթիռի խոցումից հետո Ռուսաստանը որոշել է աքցանի մեջ առնել Թուրքիային: Սիրիական ճգնաժամի պատճառով Ռուսաստանը սիրիական Հմեյմիմ ռազմաբազայում մեծացրեց իր ռազմական ներկայությունը: Այնտեղ սկսեցին տեղակայվել ռազմական ինքնաթիռներ, ուղղաթիռներ, տանկեր և S400 հակաօդային պաշտպանության համակարգեր: Մինչ այդ այնտեղ տեղակայվել էին նաև S300 տիպի հրթիռային համակարգեր: Տարբեր տեղեկություններով Սիրիայում ռուսական ինքնաթիռների և ուղղաթիռների քանակը հասնում է 55-ի: Վերջին օրերին ռուսական Rostov on Don սուզանավը հյուսիսից ուղարկվեց և կանգ առավ Սիրիայի ափերի մոտ, որը զինված է 2500 կմ հարվածող «Կալիբր» տիպի թևավոր հրթիռներվ:

Սև ծովում Ղրիմի միացումից հետո Ռուսաստանն ամրապնդեց իր դիրքերը և սկսեց համալրել սևծովյան ռազմական նավատորմը:

Երեկ տեղեկություն ստացվեց Հայաստանի Էրեբունի ռուսական ռազմաբազան ռազմաօդային նոր միջոցներով համալրելու մասին և ստացվեց ուղղաթիռների առաջին խմբաքանակը: Սակայն մինչև տարվա վերջ սպասվում է ևս մեկ խմբաքանակի ժամանումը:

Վերջին օրերին Հարավային Կիպրոսում ռուսական ռազմական մասնագետները ուսումնասիրություններ են կատարում այնտեղի ռազմական հնարավորություններն օգտագործելու ուղղությամբ:

Այս պահին Կասպիծ ծովում ռուսական ռազմածովային ուժերը զորավարժություններ են անցկացնում, որին մասնակցում է մոտ 50 ռազմանավ: Նրանց մեջ են նաև հոկտեմբերի 7-ին Կասպից ծովից Սիրիայում ԻՊ-ի դիրքերին հրթիռակոծած նավերը:

Ռուսաստանը Իրանի կողմից ևս փորձում է արգելափակել Թուրքիայի հնարավորությունները: Իրան-արևմուտք հարաբերությունների կարգավորումից հետո Ռուսաստանը սկսեց Իրանին մատակարարել S300 հրթիռային համակարգեր: Իսկ այսօր հայտնի դարձավ, որ Իրանը կիսով չափ կրճատել է Թուրքիա մատակարարվող գազի քանակը: Բացի այդ, տարածաշրջանում համընկնում են ռուս-իրանական շահերը` կապված Իրաքի և Սիրիայի խնդիրների հետ: