Արտառոց բան չկա․ Լոռու մարզպետը՝ բուշլատով զորամաս գնալու և իր խորհրդականի հայտնի ձայնագրության մասին

Օրերս, ՀՀ Զինված ուժերի գլխավոր շատբի հայտնի հայտարարությունից հետո, որով վարչապետի հրաժարականի պահանջ է ներկայացվել, Լոռու մարզպետ Արամ Խաչատրյանին, տեսել են 3-րդ բանակային կորպուսի N զորամասում՝ զինվորական բուշլատով։ Մեր տեղեկություններով` Արամ Խաչատրյանը զորամաս գնացել է ոչ իր ծառայողական մեքենայով։ Կասկածներ կար, որ նա չի ցանկացել իր այցին պաշտոնական երանգ տալ և նկատելի լինել։ Սակայն նրան ֆիքսել են։

Իսկ զորամասում Արամ Խաչատրյանին թույլ չեն տվել մտնել ներս, բայց նա այնտեղ հանդիպել է զինծառայողների։

NEWSPRESS․am-ը փորձեց ճշտել, թե ինչ նպատակով է մարզպետն այցելել զորամաս և ինչո՞ւ է եղել զինվորական համազգեստով։ 

—Ուրիշ բան չկա, եղանակային պայմանների հետ է պայմանավորված։

Ներեցեք, դուք ցուրտ եղանականերին միշտ բուշլատո՞վ եք աշխատանքի գնում, այլ վերանշոր չունե՞ք։

-Եթե պետք է այդ ոճի մեջ հարց տաք, ավելի լավ է չխոսենք։

Ոչ, պարզապես հետաքրքիր էր, ինչո՞ւ եք բուշլատով եղել և ինչո՞ւ եք հենց ԳՇ կազմի հայտարարությունից հետո այցելել զորամաս։

-Ես միշտ այդ զորամաս չեմ այցելում։ Գնացել էի իմ ընկերներին այցելելու։ Ես քանի տարի այդ զորամասում եմ ծառայել։ Մուտք չեմ արել (նկատի ունի դարբասներից ներս չի մտել-խմբ․)։ Բուշլատն էլ ընկերներիցս մեկը տվեց։ Իմ տաք վերնաշորը աշխատանքային սենյակում էի թողել, չէի պատկերացնում, որ ցուրտ կլինի։ Տվեցին հագա, էլի վերադարձրեցի։ Արտառոց բան չկա։

Իսկ Ձեր ընկերներին ԳՇ կազմի հայտարարության հետ կապված որևէ հրահանգ, կարգադրություն կամ խնդրանք եղա՞վ Ձեր կողմից։

-Ոչ, ոչ մենք տարբեր հարցեր ենք քննարկել, բայց այցս Գենշտաբի հայտարարության հետ որևէ կապ չուներ։ 

Իսկ այսօր մասնակցելո՞ւ եք Նիկոլ Փաշինյանի նախաձեռնած հանրահավաքին։

-Միանշանակ մասնակցելու եմ

Նախատեսո՞ւմ եք Ձեզ հետ մարդկանց տանել։

-Ոչ, ես միայնակ, որպես քաղաքացի մասնակցելու եմ, իսկ իմ հետ ո՞վ կգա՝ չգիտեմ։

Իսկ ինչպե՞ս կմեկնաբանեք, Ձեր խորհրդական Արմեն Հարությունյանի ձայնագրությունը, որտեղ նա խոստովանում է, որ զանգահարում է մարդկանց՝ նրանց տեղափոխումը Երևան կազմակերպելու համար։

-Ես հրապարակային կոչ եմ արել լոռեցիներին, մեր համաքաղաքացիներին՝ գալ հանրահավաքին։ Արմեն Հարությունյանն էլ մեր աշխատակիցն է, մեր քաղաքական թիմի ներկայացուցիչն է և կան մարդիկ, որ զանգահարում են իրեն ու ասում, որ ցանկություն ունեն գալ հանրահավաքի և տեխնիկական հարցեր են ճշտում։ Այնպես որ, որևիցե պարտադրանք այսօր գիտեք, որ չի կարող լինել։ Ով ցանկություն ունի՝ կարող է գալ հանրահավաքի։ Կան մարդիկ, որ մեզ քննադատում են, բայց կարող եք, դուք էլ համոզվել, որ ոչ մեկին ոչ աշխատանքից են ազատում, ոչ էլ պարտադրում են։ Դա իրենց կամարտահայտությունն է։

Բայց Արմեն Հարությունյանն ասել է, որ ոչ թե իրեն են զանգահարում, այլ ինքն է զանգահարում, իսկ այս պահին էլ զբաղվում է դպրոցների հարցով։

-Ձայնագրության մեջ նման բան չկա, որ ինքն ասի՝ զանգում է։

Ասում է՝ «աշխատել ենք՝ զանգերով, խոսք են տվել, որ գան» և զբաղվում ենք դպրոցների հարցով։

-Չէ՛, դպրոցների հարցով ինքը չի զբաղվում, իսկ մնացածը, մեր կուսակցության անդամները կազմակերպչական աշխատանքներ են տանում ու ես որևէ արտառոց բան չեմ տեսնում։ Իսկ դպրոցներին ինքը չի զանգում․ կարող է դպրոցներից իրեն զանգեն ու ցանկություն հայտնեն գալու։ Իսկ աշխատանքային ժամից հետո իրենց իրավունքն է գալ հանրահավաքի։ Արտառոց բան չկա։

Պարո՛ն Խաչատրյան, Դուք նախկին իշխանության օրոք եղել եք Վանաձորի ավագանու ընդդիմադիր անդամ։ Նման հարցերում միշտ ընդդիմախոսել եք։ Ինպե՞ս կվերաբերվեիք զանգերի հետ կապված այս պատմությանը, եթե դա աներ նախկին իշխանությունը ու Դուք լինեիք ընդդիմախոս։

-Դուք ճիշտ եք, եղել եմ ընդդիմախոս, կխնդրեի բացեիք արխիվային տեսանյութերն այն ժամանակվա և Ձեր հարցի պատասխանը կգտնեիք։

Այսինքն, ուզում եք ասել, որ դա ճիշտ չէ, և այն ժամանակ դրա համար կընդդիմախոսեի՞ք։

-Ես ի՞նչ նկատի ունեմ, ամեն բամբասանքի և չճշտված ինֆորմացիաներ չեմ մեկնաբանում և դրա հետևից չեմ գնում (նկատի ունի ձայնագրությունը-խմբ․)։ Ես պետք է բազմակողմանի ուսումնասիրեմ ու նոր մեկնաբանեմ։ Ինչ-որ փողոցային խոսակցությունների և մոնիպուլիացիաների հետ կապված ես այն ժամանակ էլ ինձ թույլ չեմ տվել եզրակացություններ անել։

Զրուցեց՝ Արմինե Մկրտումյանը