Երդվում եմ իմ հոր գերեզմանով՝ ես թուրքերից ոչինչ չեմ խնդրել. Յուրի Խաչատուրովը՝ Ազատության հրապարակում

«Հայրենիքի փրկության շարժմանը» միացած ԳՇ նախկին պետ Յուրի Խաչատուրովը ելույթ ունեցավ Ազատության հրապարակում: 

Քաղաքացիները, ողջունելով նրան, վանկարկեցին նրա ազգանունը, իսկ նա ներողություն խնդրեց, որ պետք է ռուսերեն խոսի:

«Ինչո՞ւ չէի գալիս այս հանրահավաքներին: Միանգամից ասեմ՝ չէի գալիս, որովհետև ինձ մի փոքր անհարմար էի զգում բանակի պասիվության պատճառով: Բայց այսօր ես ուրախ եմ, մեր բանակը վերջապես արթնացել է և որոշում է կայացրել: Հիմա տեղեկություն է ստացվել իբր ինչ-որ խմբեր՝ զինված, ուզում են ձերբակալել ԳՇ պետին, ես չգիտեմ՝ ինչ հիմարներ կարող են լինել, որոնք կգնան ձերբակալելու զինվորականներին»:

Անդրադառնալով «Իմ քայլը» խմբակցության պատգամավոր, ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի պետության կրակելու իրավունքի մասին հայտարարությանը, Խաչատուրովն ասաց.

«Վերջերս լսեցի այդ ընկերոջը, եթե կարելի է նրան ընկեր ասել, Անդրանիկ Քոչարյանին: Ասում է՝ կկրակենք: Գիտե՞ք՝ ես նրան լավ գիտեմ: Նա դժբախտ մարդ է: Նա համազգեստ է հագել, մորուք է պահել, կարծում է՝ լավ տղա է, արտասովոր մոլագար է, ուրիշ ոչինչ: Չնայած 92 թվականին որոշակի օգուտ է բերել բանակին, բայց դա շատ վաղուց էր ու արդեն մոռացել ենք»,- ասաց ԶՈւ ԳՇ նախկին պետը:

Խաչատուրովն անդրադարձավ նաև 2016 թվականի ապրրիլյան պատերազմին՝ նշելով, որ բոլորն ասում են, որ մենք պարտվել ենք, ասում են՝ մենք խնդրել ենք աշխարհին:

«Ես երդվում եմ իմ հոր գերեզմանով, թուրքերի առաջ և թուրքերից ես ոչինչ չեմ խնդրել: Նրանք են ինձնից միշտ խնդրել և միշտ սպասել են, թե մենք ինչ կասենք: Ինձ համար անհարմար է պատմելը, բայց որ պահը եկել է, ասեմ. Սադիկովն (նկատի ունի
Նեջմեդդին Սադիկովին՝ Ադրբեջանի ԶՈւ գլխավոր շտաբի պետ-հեղ.) իրեն շատ վատ էր զգում, երբ Մոսկվայում հանդիպում էինք: Շատ վատ: Այնտեղ շատ սպաներ, գեներալներ էին լինում, նա քննարկումներից հետո պարտված էր լինում, իսկ մենք հաղթող էինք»,- պատմեց Խաչատուրովը: 

Նրա խոսքով՝ մեզ շատ դժվար է լինելու բանկը վերականգնել և այնպես անել, որ մեր երկրում մարդիկ սկսեն ժպտալ միմյանց, դա շատ դժվար է անել:

«Ես կարծում եմ, որ Վազգեն Մանուկյանը մեկ տարում կարող է դա անել: Ես նրան ճանաչում եմ, նա շատ տաղանդավոր, խիզախ և խելացի մարդ է և շատ ազնիվ մարդ է»,- նշեց ԶՈւ ԳՇ պետը: