Պատերազմական իրավիճակում գտնվող երկրի տեղեկատվական անվտանգությունը պետք է ամենաբարձր մակարդակի լինի. Հ. Չոբանյան

Measuring the Information Society-ն ներկայացրել է տարբեր երկրներում համացանցի որակին վերաբերող հերթական զեկույցը: Առաջատարը Հարավային Կորեան է` 8.93 միավորով: Վարկանիշային աղյուսակում ներառվել է 167 երկիր, որոնց թվում Հայաստանը 5.35 միավորով զբաղեցրել է 76-րդ հորիզոնականը, Ադրբեջանն ունի 5.79 միավոր, Թուրքիան՝ 5.58 միավոր:

«Դա չափազնաց վատ ցուցանիշ է Հայաստանի համար»,- newspress.am-ին ասաց Ինֆորմացիոն տեխնոլոգիաների ձեռնարկությունների միության փոխտնօրեն Հայկ Չոբանյանը:

Ըստ նրա, համացանցի որակի անվանակարգում Հայաստանը մի քանի կետում լավ ցուցանիշներ ունի. օրինակ բջջային կապի տարածվածության մակարդակը, որը բավարար չէ ընդհանուր գնահատականի համար:

Հայկ Չոբանյանը նշեց այն երկու կետերը, որոնք ազդել են նման ցածր ցուցանիշի վրա՝ էլեկտրոնային ծառայությունների մասսայականությունը և համացանցի տեղեկատվության անվտանգության մակարդակը:

«Մեր երկրում էլեկտրոնային ծառայությունները տարածված չեն և այս առումով Հայաստանը ըստ դասակարգման 91-րդ դիրքում է: Թեև այս տարի ընդունվել է անհատական տվյալների պաշտպանության նոր օրենքը, իսկ անցած ամիս նաև ստեղծվել է Անհատական տվյալների պաշտպանության գործակալությունը, սակայն դեռևս գործնական մեխանիզմներ չեն գործում»,- ասաց նա:

Նաև նշեց, որ վերջին տարիներին բարձրացել է էլեկտրոնային ծառայությունների ծավալը՝ նաև էլեկտրոնային թվային ստորագրության համակարգի ներդրմամբ, սակայն այն կրում է պարտադրված բնույթ:

«Այլ կերպ ասած՝ մենք զարգացում չէինք ունենա, եթե հարկային էլեկտրոնային հաշվետվությունները պարտադիր չդառնային։ Դրական գնահատելով ֆինանսների նախարարության կողմից էլեկտրոնային ծառայությունների ներդրմանն ուղղված քայլերը, միաժամանակ պետք է նշեմ, որ կառավարությունը պետք է հավասարակշռություն ապահովի՝ նպաստելով նաև քաղաքացու տարբեր կարիքները հոգալուն, հոգսերը թեթևացնելու ուղղված էլեկտրոնային ծառայությունների ներդրմանը։ Համացանցի և տեղեկատվության անվտանգության մակարդակը շատ ցածր է»,- ասաց ԻՏՁՄ փոխտնօրենը:

Ի՞նչ անել իրավիճակը շտկելու համար, Հ. Չոբանյանը նշեց, որ կան աշխարհում կիրառվող ընդունված մեխանիզմներ։ Գրեթե պատերազմական իրավիճակում գտնվող երկրի տեղեկատվական անվտանգությունը պետք է ամենաբարձր մակարդակի լինի:

«Այս երկու կետերը խիստ կարևոր են և այս երկու կետով է, որ Հայաստանը հատկապես թերանում է։ Այդ է պատճառը, որ մենք անգամ Ադրբեջանից հետ ենք մնում: Լավը և կարևորն այն է, որ այս հարցերի լուծումները մեր ձեռքերում են, ընդհամենը պետք է, որ կառավարությունն ու ՏՀՏ ոլորտը վստահաբար և համագործակցությամբ գնան խնդիրները շտկելու, ենթակառուցվածքներ ձևավորելու ուղղությամբ»,- շեշտեց ԻՏՁՄ-ն: