Այս պահին ես որևէ հանձնարարական չունեմ. թաղապետարանից պարզաբանում են փոխթաղապետի ազատման մասին լուրը

Ավան վարչական շրջանի թաղապետի տեղակալ Ներսես Պողոսյանի անպարկեշտ գրառումը («Սիրտս Արփինե Հովհաննիսյան ա ուզում») մեծ աղմուկ բարձրացրեց։ Վերջինս, պաշտոնյային ոչ հարիր պահելաձև էր ցուցաբերել, ինչը ակտիվ սկսվեց քննարկվել սոցցանցերում։ Փոխթաղապետին արձագանքեց նաև Արփինե Հովհաննիսյանի ամուսինը, որից հետո լուրեր տարածվեցին, թե հիվանդության պատճառով արձակուրդում գտնվող Պողոսյանն այլևս չի վերադառնա արձակուրդից՝ նրան կազատեն աշխատանքից։

NEWSPRESS.am-ը փորձեց պարզել, թե որքանով է լուրը համապատասխանում իրականությանը։ 

Զանգերն սկսեցինք քաղաքապետարանից։ Սակայն մեզ չարձագանքեցին։ Թաղապետարանից ևս մեր զանգահարաց 4 համարներից և ոչ մեկը չպատասխանեց։ Միայն հաջողվեց խոսել ընդհանուր բաժնից Վարսիկ Պետրոսյանի հետ։ Վերջինս նախ հորդորեց խոսել թաղապետի, կամ փոխթաղապետի հետ, սակայն իմանալով, որ մեր զանգերն այդ հասցեներով ապարդյուն են եղել՝ ասաց․

«Այս պահին ես որևէ որոշում փոխթաղապետի ազատման հետ կապված չունեմ։ Դե երեկ է եղել միջադեպը, այսօր ես դեռ ոչ մի փաստաթուղթ չունեմ, ոչ էլ հանձնարարական»,-ասաց թաղապետարանի աշխատակցուհին և նկատեց, որ չի կարող ասել՝ կազատե՞ն աշխատանքից Պողոսյանին, թե՞ ոչ։

«Պաշտոնը հայեցողական է և ազատել-ընդունելը միայն  ղեկավարի իրավասության մեջ է՝ ընդունում և ազատում է թաղապետը։ Թե նա ինչ որոշում է կայացրել՝ տեղյակ չեմ»։

Հարկ է հիշեցնել, որ Ներսես Պողոսյանը նախ ջնջեց իր գրառումը, ապա իր ֆեյսբուքյան էջը։