Քո սպառնալիքների վրա թքած ունենք. մեր որդիներն են զոհվել, մեր որդիները հաշմանդամ են դարձել, մենք Շուշի ենք կորցրել. Նազարյանը՝ Անդրանիկ Քոչարյանին

Ստորև ներկայացնում ենք «Այլընտրանքային նախագծեր խմբի» անդամ Գեղամ Նազարյանի՝ «Ձեր պատճառով մեզ վրա արդեն կրակել են» վերտառությամբ հոդվածը:

«Անդրանիկ Քոչարյանի հայտարարությունը, թե վարչախումբը հարկ եղած դեպքում պատրաստ է կրակել ժողովրդի վրա, ցնցել է հանրությանը, չնայած Արցախը թշնամուն հանձնածներից ու մի ամբողջ սերունդ զոհածներից ամեն ինչ սպասելի է։

Բայց սրան ուզում եմ հատուկ պատասխանել.

Մարդ, որը բոլորից առաջ ընկավ ու ի լուր աշխարհի հայտարարեց, որ մենք պարտվել ենք ինչպես մարտի դաշտում, այնպես էլ բարոյապես, այսօր թուրքից պարտվելուց հետո պատրաստվում է կրակել Երևանի կենտրոնում:

Սա մարտահրավեր է եւ նա անձնապես պատասխան է տալու սրա համար։ Վաղեմության ժամկետ այս ձեւակերպումը չունի։

Մեզ ես վախեցնո՞ւմ.

Ձեր պատճառով մեզ վրա արդեն կրակել են: Ընդ որում՝ կրակել են ամենաժամանակակից զենքերով, կրակել են բոլոր հնարավոր միջոցներով: Թուրք, ադրբեջանցի, վարձկաններ՝ ձեռք-ձեռքի տված կրակել են մեր տղերքի վրա, որովհետեւ այդ պահին իշխանության դու ես եղել ու մի խումբ այլ փսլնքոտներ։

Ձեր պատճառով մեր որդիներն են զոհվել՝ հինգ հազար լույս տղա: Ձեր կեղտոտ քաղաքականության եւ քայլերի պատճառով ունենք տասը հազար վիրավոր, ունենք տղերք, որ զրկվել են ողնաշարից, ոտքից և ձեռքից, ոտքերից եւ ձեռքերից, կորցրել տեսողությունը, կորցրել հոգեկան հանգիստը։

Ձեր պատճառով ունենք գերիներ, ունենք բազում անհետ կորածներ: Ու այսքանից հետո սպառնում ես մեզ վրա էլ կրակե՞լ: Ուշադի՛ր լսիր, ականջիդ օղ արա, մեր որդիներն են զոհվել, մեր որդիները հաշմանդամ են դարձել, մենք Շուշի ենք կորցրել ու քո սպառնալիքների վրա թքած ունենք: Սպառնալիքներդ վկայում են միայն ձեր սարսափների մասին: Եւ եթե սա մարտահրավեր է, ապա համարիր այն ընդունված:

Կապրենք, կտեսնենք»: