Արթուր Ալեքսանյանը նեղացած է․ հնարավոր է՝ նա լքի Հայաստանը

Վերջին շրջանում կառավարությունն ակտիվորեն սկսել է կրճատել կարևորագույն ոլոտներին ուղղվող ֆինանսավորումները։ Կրթության, գիտության, մշակույթի և սպորտի սուպերնախարարությունը ևս նեղն է ընկել։ Մասնավորապես 10%-ով կրճատվել է սպորտի ոլորտին ուղղվող գումարները։ Դրանից բացի մարզիկների վրա դրվել է 20-30% հարկային պարտավորություններ։

NEWSPRESS.am-ի տեղեկություններով` հայ հունահռոմեական ըմբշամարտիկ, օլիմպիական չեմպիոն Արթուր Ալեքսանյանը, ով հայտնի է «Սպիտակ արջ» կեղծանունով, նեղ շրջանակում սրտնեղել է, թե կառավարությունը չի թողնում շնչել և, եթե այսպես շարունակվի, հնարավոր է շուտով լքի Հայաստանը։

Մեր տեղեկություններով` Արթուր Ալեքսանյանին միայն հարկերը չեն նեղում, նա նեղացած է նաև գործող իշխանության վերաբերմունքից։

Շատերը կհիշեն, որ նախորդ տարեվերջին ակտիվ շրջանառության մեջ մտավ 2021 թվականի աշնանը կայանալիք Գյումրիի քաղաքապետի ընտրություններում Ալեքսանյանի թեկնածության հարցը։

Ասում են, որ իշխանությունների ընտրությունը կանգնել է ըմբշամարտիկի վրա, քանի որ վերջիններս ցանկացել են, մեղմ ասած, պոկել մարզիկին «Բարգավաճ Հայաստան» կուսակցության ղեկավար Գագիկ Ծառուկյանից։

Ըմբշամարտի հայրը՝ Գևորգ Ալեքսանյանը, ով նաև նրա մարզիչն է, այդ օրերին լրատվամիջոցներին հայտնել է, որ որդին չի մասնակցում Ծառուկյանի աջակցությանն ուղղված ակցիաներին։

«ՀԱՕԿ-ից զանգել կանչել են, որ մասնակցի, բայց Արթուրը չի գնացել»,-ասել է հայրը։

Իսկ Արթուր Ալեքսանյանը քաղաքապետի իր թեկնածության մասին լուրերն անվանել է անհեթեթություն․

«Դա անհեթեթություն է, քանի որ ես պատրաստվում եմ 2021 թվականին մասնակցել Տոկիոյում կայանալիք օլիմպիական խաղերին և որևէ այլ բանի մասին չեմ մտածում»․․․

Սակայն հարկ է նկատել, որ իշխանական կուսակցությունը՝ «Քաղաքացիական պայմանագիր»-ը, Արթուրի թեկնածության մասին լուրը չեն հերքել։ Մեր տեղեկություններով, ոչ թե Արթուրը, այլ հետո հենց ՔՊ-ն է հրաժարվել Գյումրիում առաջադրել մարզիկի թեկնածությունը։

Ամեն դեպքում ակնհայտ է, որ մարզիկի և ՔՊ-ի միջև սև կատու է անցել, որից հետո Արթուրն ինչ-որ բանից նեղացել է։

Ըմբշամարտիկն անգամ նեղ շրջապատում ասել է, որ Տոկիոյում կայանալիք օլիմպիական խաղերից հետո հեռանալու է Հայաստանից։