«Կարևոր չէ՝ ով կլինի երկրի ղեկավարը, կարևորը՝ ես չտեսնեմ Հայաստանի վերջը»․ Նիկոլայ Ծատուրյան

«Ես հորս տատի կողմնակիցն եմ»։ Այսպես է պատասխանում վաստակավոր արտիստ Նիկոլայ Ծատուրյանը բոլորին, ովքեր իրեն հարցնում են, թե ում կողմնակիցն է՝ Նիկոլ Փաշինյանի՞, թե՞ 17+ի։

Նա նկատում է, որ կառավարություն գոյություն չունի, իսկ 17-ն էլ կոնկրետ ծրագիր չի առաջարկում, պարզապես փորձում է ձեռքերը լվալ պատասխանատվությունից։

Նիկոլայ Ծատուրյանը հեռուստացույց չի միացնում, որովհետև գիտի, որ ոչ մի խելացի ու ճիշտ բան չի լսելու՝ հոգնել է։ 

Նա նկատում է, որ այն ինչ տեղի ունեցավ՝ մի պր պայթելու էր, բայց միևնույն ժամանակ չի արդարացնում Փաշինյանին։ Ծատուրյանը խոստովանում է, որ ժամանակին հավատում էր Փաշինյանին ու մտածում էր, որ երկրում դրական տեղաշարժ կլինի, սակայն այսօր տեսնում է՝ ոչ միայն իր, այլ ժողովրդի հավատը Փաշինյանի նկատմամբ մարել է։ Մինչդեռ ամեն ինչ Նիկոլի ձեռքին է, նա է երկրի տերը և ինչ ուզեր՝ կարող էր անել։

«Դեմոկրատիան խիստ զարգացած երկրների համար է, մենք սաղմային վիճակում ենք։ Ես մի քանի անգամ ասել եմ՝ ախմախ հանճարեղ ազգ ենք։ Հանճարեղ ենք՝ մեր հայտնիներով, ախմախ ենք՝ դիվանագիտական առումով»,-բացատրում է Ծատուրյանը։

Արտիստի գնահատմամբ հայրենիքը միայն բղավելով չի մերը, հայրենիքի համար պետք է պայքարել է պետք։

«Իսկական հայերնասերն այն զինվորն է, որ ճակատում կռվեց ու հիմա սահմանին է»,-ասում է Նիկոլայ Ծատուրյանն ու ցավով է նկատում, որ մարդիկ այսօր ընտանիքներով են լքում երկիրը։

Նրա համար կարևոր չէ՝ ով կլինի երկրի ղեկավարը, կարևորը, որ ինքը չտեսնի Հայաստանի վերջը․․․

«Մեզ պետք է մի նոր մարդ, հզոր մարդ, որ թևերը կշտի և էս թափթուկներին մաքրի»,-եզրափակեց Ծատուրյանը։