Գործազրկության և աղքատության մակարդակը խորացել է․ նախկին ամեն չորրորդի փոխարեն այսօր աղքատ է ամեն երրորդը. տնտեսագետ

Տնտեսագետ Թադևոս Ավետիսյանը գործող կառավարությանն իր անունն է տվել՝ «անդաստիարակ ծրագիր», քանի որ իշխանությունն օգտվելով ժողովրդի էյֆորիկ վիճակից, որևէ չափելիություն չդրեց իր խոստումների մեջ։

Ըստ տնտեսագետի, ի սկզբանե պարզ էր, որ ունենալու էինք անպատասխանատվության մաքսիմում շրջանակ, որը բերելու էր կառավարման խնդիրների․ կառավարության ու, մասնավորապես Նիկոլ Փաշինյանի տված խոստումները իրականում հակառակը եղան:

«Գործազրկության մակադակը խորացել է, աղքատության մակարդակը՝ բարձրացել, և դրան զուգահեռ արձանագրվում է ՀՆԱ-ի և արտահանման անկում»,-այդ մասին տնտեսագետն ասաց լրագրողների հետ հանդիպմանը:

Նրա գնահատմամաբ, սոցիալական երջանկությունից խոսացողները 2019 թվականին արձանագրեցին աղքատության մակարդակի 3 տոկոսային կետի աճ՝ 2018-ին 23.5 տոկոս է եղել աղքատության մակարդակ, 2019 -ին՝ 26.5 տոկոս

«Համոզված եմ, որ 2020 թվականի ամփոփված տվյալներով, աղքատության մակարդակը կհասնի 30 տոկոսի և հասարակությունը կարձանագրի, որ Հայաստանում նախկին ցուցանիշներով ամեն չորրորդի փոխարեն արդեն ամեն երրորդը դարձել է աղքատ»,-ասաց տնտեսագետը՝ հավելելով, որ նույն վիճակն է նաև կապիտալ ծախսերի գծով:

«2019 թվականի մեծ թիվ գրեցին բյուջեում, ցույց տվեցին որ գործ են անում, բայց արդյունքում այդ գումարի 60 տոկոսը չծախսեցին»,- ասաց Ավետիսյանը։

Ըստ տնտեսագետի բերած տվյալների, արտաքին պարտքը դրամային արտահայտությամբ աճել է 22 տոկոսով՝ 5-6 անգամ ավելի արագ, քան երկրում ստեղծված ավելացված արժեքը:

«Եթե այս իրշախանությունը, Աստված չանի շարունակի մնալ և 2021 թվականը փակի, ապա մենք ՀՆԱ-ին համարժեք պարտք ենք ունենալու»,- հայտարարեց Թադևոս Ավետիսյանը և նկատեց, որ միայն այս իշխանությունների օրոք արդեն 1.9 մլրդ դոլարով ավելացել է պետական պարտքը և հասնում է արդեն ՀՆԱ-ի անթուլատրելի շեմին՝ 70 տոկոսին: