«Հաշտություն թուրքերի հետ, որի արդյունքում հայերը ոչինչ չեն ստանա». որն է լինելու գինը

Որևէ պետական պաշտոնյա չի համապատասխանում իր զբաղեցրած պաշտոնին․ այլ կերպ ասած՝ տեղում չէ, ինչի հետևանքով էլ մեկը մյուսի հետևից գլուխ են բարձրացնում նոր խնդիրներ։

Օրինակ «Համերաշխություն» կուսակցության նախագահ Սարգիս Ավետիսյանը համոզված է, որ քանի դեռ այս իշխանությունն է երկիրը ղեկավարում՝ մեր բանակը հաջողություն չի կարող գրանցել։ 

Սակայն մյուս կողմից էլ նա նկատում է, որ այս մասին այնքան է խոսվել, որ հասարակության ականջը սովորել է նման հայտարարություններին ու շատերը խնդրին անլուրջ են վերաբերվում, մինչդեռ իշխանությունից օր առաջ ազատվելը օրհասական է։

Նա վարչապետ Նիկոլ Փաշինյանին նկարագրում է մեկ նախադասությամբ՝ մարդ, ով գնացել է կապիտուլիացիայի ստորագրման։

«Դա այն փաստաթուղթն է, որով թշնամուն ասում ես՝ ինձ հետ վարվիր այնպես, ինչպես կուզես»,-ասաց նա իր հարցազրույցի ժամանակ։

Անդրադառնալով Հայաստանից ծառայողներին Արցախ չուղարկելու խնդրին, Սարգիս Ավետիսյանը նկատեց, որ սա ՀՀ առաջին նախագահ Լևոն Տեր-Պետրոսյանի քաղաքականությունն է, որը իրականացնում է Նիկոլ Փաշինյանը։

Քաղաքագետը նկատում է, որ այդ կերպ նաև Փաշինյանն սկսեց տարանջատել հներ-նորեր, սպիտակ-սև, ղարաբաղցիներ-հայաստանցիներ, ինչն էլ իր ազդեցությունն ունեցավ նաև ուժային կառույցների վրա։

Սարգիս Ավետիսյանը նկատում է, որ պատերազմի ժամանակ այն հատվածներում, որտեղ առաջադրանքները դրված էին բանակի վրա՝ բանակը փայլուն կատարել է այն։ Թուրքերը այդ տարածքներում մի քանի մետր անգամ առաջ չեն եկել, իսկ որտեղ դավաճանություն է եղել՝ տարածքը բացվել է, որտեղից էլ թշնամին մտել է։

«Թող դավաճանները պատասխան տան, բայց չի կարելի բանակի հաշվին ավելորդ խոսել, քանի որ մենք իրականում ունենք հզոր բանակ։ Նա իր գործը կատարել է, երբ տեղի է ունեցել կապիտուլացիա և բանակին դրել է խնդրի առաջ»,-ասաց Ավետիսյանը։

Նա նկատում է, որ այն ծրագիրը, որով այսօր գնում է Հայաստանի իշխանությունը, հետևյալն է՝ հաշտության գնալ թուրքերի հետ, որի արդյունքում հայերը ոչինչ չեն ստանալու։

«Գինը լինելու է հրաժարվել ցեղասպանության ճանաչման պահանջից, որից հետո միջազգային հասարակությունը ասելու է՝ հարգելի Ռուսասատան, ի՞նչ գործ ունես այդ տարածում, մարդիկ իրար հետ հաշտ ու համերաշխ ապրում են և պահանջելու են ռուսական զորքը դուրս հանել։ Իսկ զորքը հանելուց շատ կարճ ժամանակ անց, թուրքեը կիրականացնեն իրենց վաղեմի երազանքը․ ամբողջ Սյունիքը կգրավեն ու կմիացնեն Ադրբեջանին, և եթե ուզեն որ Երևանի մի փոքր մաս մնա հայերին՝ հայեր կլինեն, եթե ոչ՝ կիրականանա Թայլաթի երազանքը՝ մեկ հայ, և այն էլ թանգարանում»,-ասաց Ավետիսյանն ու հուսդրող տոնով վստահեցրեց․ «Ամեն ինչ շատ լավ է լինելու, բանը դրան չի հասնի»։