Քարոզարշավի ժամանակ վճարովի եթերի 90%-ը ՀՀԿ-ն էր

Հոկտեմբերի 26-ից նոյեմբերի 6-ը, ընդհանուր առմամբ, հեռուստաեթերով «ոչ»-ին ավելի շատ է անդրադարձ եղել, իսկ 6 քաղաքական ուժերի համեմատությամբ եթեր ամենից շատ տրամադրվել է ՀՀԿ-ին:

Այդ մասին, այսօր հայտարարեց Երևանի մամուլի ակումբի նախագահ Բորիս Նավասարդյանը:

«ՀՀ Սահմանադրության փոփոխությունների 2015թ. դեկտեմբերի 6-ի հանրաքվեի լուսաբանումը Հայաստանի հեռարձակվող ԶԼՄ-ներում» մոնիթորինգի արդյունքները ցույց են տվել, որ ակնհայտ կողմնապահություն որևէ մեկի կողմից չի արձանագրվել:

Նավասարդյանը ողջունելի համարեց, այն, որ «Այո-ոչ» ռեալիթի շոուն բավական դրական էր, քանի որ ցուցադրվում էր ոչ միայն «Արմնյուզի» եթերում, այլ նաև «Արմենիա» և Հ1 հեռուստաալիքներով:
Բորիս Նավասարդյանի դիտարկմամբ` մոնիթորինգի երրորդ փուլում արդեն ՀՀԿ-ն բավական մեծ առավելություն է ստացել բոլոր մնացած քաղաքական ուժերի նկատմամբ: Այս հանգամանքը նա պայմանավորում է նախագահ Սերժ Սարգսյանի հարցազրույցով:

«Այստեղ որևէ օրենքի խախտում չենք կարող արձանագրել, բայց քարոզչության առումով անցանկալի երևույթ էր, քանի որ նախագահին հարցեր տալու հնարավորությունը քիչ է, և բնականաբար հրաժարվել այդ հնարավորությունից լրատվամիջոցները չէին կարող թույլ տալ: Բայց հարցազրույցը փոխեց պատկերը»,- ասաց նա:

Բորիս Նավասարդյանը նկատեց, որ «Այո»-ի ճակատից ՀՀԿ-ն 10 ժամ ավելի եթեր է ստացել, քան ՀՅԴ-ն, իսկ ԲՀԿ-ն ընդհանրապես բավական պասիվ քարոզարշավ է իրականացրել: «Ոչ»-ից՝ վերջին երկու շաբաթներին ՀԱԿ-ը առաջ է անցել և՛ ՕԵԿ-ից, և՛ «Ժառանգությունից»։

Հարկ է նկատել նաև, որ վճարովի եթերի 90% -ը ՀՀԿ-ն էր զբաղեցրել:

«Սա խոսում էր ռեսուրսների հնարավորության մասին»,- ասաց Բորիս Նավասարդյանը: