Այժմ, երբ ամեն ինչ ունեմ, երազում եմ ունենալ 3 երեխա. Արթուր Աբրահամ (տեսանյութ)

«Այժմ, երբ ամեն ինչ ունեմ, ամուսնացել եմ, երազում եմ ունենալ 3 երեխա»,-այդ մաին լրագրողների հետ հանդիպմանն ասաց հայ պրոֆեսիոնալ բռնցքամարտի սուպերմիջին քաշային կարգի WBO վարկածով աշխարհի չեմպիոն Արթուր Աբրահամը:

Նա հայտնեց, որ անձնական կյանքում փոփոխություն ունի: Ամուսնացել է 6 ամիս առաջ՝ Հայաստանում: Կնոջ անունը Մերի է: Նա Երևանի պետական համալսարանի բանասիրական ֆակուլտետի ուսանող է:

Լրագրողի դիտարկմանը, թե ինչու այդպես թաքուն՝ Աբրահամը պատասխանեց. «Թաքուն չի ստացվել, ես չէի ցանկանում իմ անձնական հարցերով մամուլը լցնել: Ընկերոջս կինն է մեզ ծանոթացրել: Ես ապրում եմ մարզական կյանքով: Շատ դժվար է լիովին տրվել անձնական կյանքին»:

Անկեղծանալով, նա ասաց, թե չի ցանկանում, որ իր երեխաները ևս դառնան բռնցքամարտիկ:

«Սա շատ տանջալից մարզաձեւ է: Իմ ծնողները եւս դեմ են եղել, իսկ մայրս մինչեւ հիմա էլ դեմ է»,- բացատրեց 35-ամյա բռնցքամարտիկը, ով հայտարարեց, թե 2 տարի հետո կթողնի ռինգն ու կզբաղվի ավելի հանգիստ կյանքով: Հայաստանում մշտական բնակություն հաստատել չի ցանկանում, բայց խոստացավ երկու տարի հետո ավելի հաճախակի լինել հայրենիքում:

Անդրադառնալով վերջին՝ Մարտին Մարեյի հետ տեղի ունեցած մենամարտին, նա նշեց. «Ծանր մենամարտ էր, քանի որ հակառակորդն ուժեղ էր: Բայց մեզ հաջողվեց հաղթել»,- ասաց Աբրահամը:

Մանրամասները` տեսանյութում