Սգո օր է, իսկ նրանք տոնում են

Եվ այսպես՝ «այո»-ի և «ոչ»-ի մրցավազքն ավարտվեց հօգուտ «այո»-ի, ասել է, թե՝ գործող իշխանության և նրանց համակիրների հաղթանակով։

Կենտրոնական ընտրական հանձնաժողովը հրապարակեց քվեարկության նախնական արդյունքները, ըստ որի «Այո» է քվեարկել ընտրողների 63,35 տոկոսը կամ 825 622 ՀՀ քաղաքացի, «Ոչ»՝ 32,35 տոկոսը կամ 421 593 ընտրող:

Թե ինչքանով պարզ, թափանցիկ ու արդար անցավ քվեարկությունը, դա այլ հարց է։ Գաղտնիք չէ, որ Հայաստանում բոլոր ընտրություններն ու համապետական քվեարկությունները, որպես կանոն, ուղեկցվել ու ուղեկցվում են ընտրակեղծարարությմաբ, ինչը վաղուց արդեն ոչ ոքի չի զարմացնում։
Հիմա էլ՝ դրա պակասը չունեցանք։ Սակայն, ի տարբերություն նախորդների, այս անգամ հատկապես շատ էին այն դեպքերը, երբ ընտրատեղամաս այցելած քաղաքացիները հնարավորություն չունեցան կատարելու իրենց քաղաքացիական պարտքը։

Ուրիշ ո՞ր երկրում է հնարավոր հանդիպել մի իրավիճակի, երբ քվեարկության գնացած քաղաքացին պարզի, որ իր փոխարեն ինչ որ մեկն արդեն քվեարկել է ու դրանից հետո ոչնչով չկարողանա հակազդել տեղի ունեցածին։

Նոր սահմանադրություն ենք ընդունում, սահմանադրական փոփոխություններ ու բարեփոխումներ գոռում ու ոտքի վրա խախտում թե հին, թե նոր, թե բարեփոխված բոլոր սահմանադրությունները՝ քաղաքացուն զրկելով սահմանադրությամբ ամրագրված իր իրավունքից։

Եթե նույնիսկ մեկ նմանօրինակ փաստ է արձանագրվում, արդեն իսկ հնարավորություն է տալիս մտածելու ու կասկածի տակ առնելու քվեարկության արդարությունը։ Իսկ երբ այդ թիվն անցնում է մի քանի տասնյակից, նորմալ երկրում գուցե և չեղյալ հայտարարվեին քվեարկության արդյունքները, իսկ մեզ մոտ… Իշխանական թևն այսօր արդեն ցնծության մեջ է։

Հաղթանակել են, ուրախ են, ցնծում են. իրենց իշխանության երկարաձգման հաղթանակն են տոնում։ Տոնում են այսօր. դեկտեմբերի 7-ին. Սպիտակի ողբերգական երկրաշարժի օրը։ Եթե չկա, վերացած է հիշողությունը, Օրացույցն անգամ այսօր սգո օր է ազդարարում։ Օր, որը սահմանվել է նույն իշխանության կառավարության կողմից։

Ինչո՞ւ հենց դեկտեմբերի 6-ն ընտրվեց որպես հանրաքվեի օր, երբ հաջորդիվ դեկտեմբերի 7-ն էր։

Ինչո՞ւ ոչ մեկ շաբաթ առաջ կամ հետո…

Այդ ե՞րբ այդչափ հոգով սնանկ դարձան։