Հայաստանի երկարակյաց ՀՀԿ-ական համայնքապետերից մեկը կրկին ընտրվեց

Հանրապետության 26 համայնքներում դեկտեմբերի 6-ին տեղի են ունեցել համայնքի ղեկավարի ընտրություններ: Շիրակի մարզի Վահրամաբերդ համայնքում վերընտրվել է գործող համայնքապետ ՀՀԿ-ական Աղվան Մարտիրոսյանը:

Newspress.am-ի հետ զրույցում արդեն վերընտրված համայնքապետ Աղվան Մարտիրոսյանը ընտրությունների վերաբերյալ նշեց, որ համայնքապետի թեկնածու էին գրանցվել երկու անձ. ինքը վերընտրվել է 300 ձայնի առավելությամբ, ընտրություններին մասնակցել է ընտրողների 40 տոկոսը:4

«Եթե եղանակը խանգարող չլիներ՝ նորմալ կմասնակցեին»,- ասաց նա:

Նշենք, որ Աղվան Մարտիրոսյանը 1991-ից 1999թթ աշխատել է որպես Վահրամաբերդի գյուղխորհրդի նախագահ, համայնքապետ է ընտրվել կրկին 2002թ-ին և առ այսօր յուրաքանչյուր համայնքապետի ընտրությունների ժամանակ կրկին ընտրվում է:

Նման երկարակեցության գաղտնիքը, ըստ նրա, իր կատարած աշխատանքներն են. անցկացրել է ոռոգման ցանց, խմելու ջրի համակարգ, կառուցել է սպորտային հրապարակ, բարեկարգել ճանապարհները

Նաև նշեց, որ ապագայի վերաբերյալ ծրագրեր ունի՝ կոյուղագծերի անցկացում:

Իսկ թե ինչո՞ւ է շուրջ 2000 բնակիչ ունեցող համայնքից 40 տոկոսը մասնակցել ընտրություններին, բացի եղանակային վատ պայմաններից, նման ցածր մասնակցությունը պայմանավորեց արտագնա աշխատողներ ունենալու փաստով:

«Մեր գյուղից մեկնում են արտագնա աշխատանքի, համայնքում չեն կարողանում իրենց գոյությունը պաշտպանեն, ունենք 190 հա վարելահող և 56 հա արոտ, որը բավարար չէ վահրամաբերդցիներին»,- ասաց Ա. Մարտիրոսյանը:

Նշենք, որ ժամանակին համայնքն ունեցել է 1000 հա վարելահող, որը տրվել է Գյումրու համայնքին, իսկ Վահրամաբերդի հողերը պակասել են:

Թեև մշակում են կարտոֆիլ, հացահատիկային կուլտուրաներ, լավ բերք են ստացել, միևնույնն է մարդիկ իրենց ապրուստը հայթայթում են արտագաղթելով:

Հարցին, թե կրկին վերընտրվելու ցանկություն ունի, ասաց. «Չգիտեմ, հետագայի հարց է»: