26 համայնքնային ընտրություններից 25-ում հաղթել են ՀՀԿ թեկնածունները

Հանրապետության 26 համայնքներում դեկտեմբերի 6-ին տեղի են ունեցել համայնքի ղեկավարի ընտրություններ:

Կենտրոնական ընտրական հանձնաժողովից հայտնեցին, որ ՏԻՄ ընտրություններ են տեղի ունեցել Արագածոտնի, Արմավիրի, Գեղարքունիքի, Լոռու, Շիրակի եւ Սյունիքի մարզերում:

Արագածոտնի մարզի Կոշ համայնքում հաղթել է գործող գյուղապետ, ՀՀԿ-ական Աշոտ Ենգիբարյանը: Արմավիրի մարզի Նորապատ համայնքում, որտեղ գործող գյուղապետն ինքնաբացարկ էր ներկայացրել, հաղթել է 31-ամյա Վահրամ Խաչատրյանը: Նույն մարզի Դալարիկ համայնքում հաղթել է գործող գյուղապետ, ՀՀԿ-ական Պարգեւ Աբրահամյանը:

Գեղարքունիքի մարզի Զովաբեր համայնքում նույնպես հաղթել է գործող գյուղապետ, ՀՀԿ-ական Սամվել Եսայանը: Նշենք, որ այս գյուղում առաջադրված մյուս թեկնածուն նույնպես իշխող կուսակցությունից էր:

Լոռու մարզի Չկալով համայնքում, որտեղ ընտրությանը մասնակցել է 115 քաղաքացի, 70 ձայնով հաղթել է գործող գյուղապետ, ՀՀԿ-ական Ռոման Շաքարյանը: Նույն մարզի Արծնի համայնքում նույնպես հաջողության է հասել գործող գյուղապետ, ՀՀԿ-ական Խնկո Խաչանեսյանը:

Արմավիրի մարզի Ֆերիկ համայնքում հաղթել է մանկավարժ, անկուսակցական Ռուստամ Հասանյանը: Մարզի մյուս երեք համայնքներում՝ Ալաշկերտում, Շահումյանում եւ Արշալույսում, հաղթել են գործող գյուղապետերը:

Գյուղապետի ընտրություններ են կայացել նաեւ Շիրակի մի շարք համայնքներում: Այսպիսով, Գառնառիճ համայնքում հաղթել է գործող գյուղապետ, ՀՀԿ-ական Վանիկ Մանուկյանը, Վահրամաբերդում՝ նույնպես գործող գյուղապետ, ՀՀԿ-ական Աղվան Մարտիրոսյանը: Նույն պատկերն է նաեւ Շիրակ համայնքում, որտեղ ձայների ճնշող մեծամասնությամբ հաղթել է գործող գյուղապետ Խորեն Հարությունյանը: Գեղանիստ համայնքում անկուսակցական, գործող Աղասի Ղազարյանը հաղթել է ՀՀԿ-ական թեկնածուին: Նահապետավանում հաղթել է գործող գյուղապետ, ՀՀԿ-ական Գոռ Պետրոսյանը: Մարզի Բասեն եւ Տուֆաշեն համայնքներում նույնպես հաղթել են գործող գյուղապետերը:

Սյունիքի մարզի Վանատուր համայնքում հաղթել է գործող գյուղապետ, ՀՀԿ-ական Հովհաննես Հովհաննիսյանը: Նույն պատկերն է նաեւ Աշոտավան, Չափնի համայնքներում: