958 կալանավորված անձ քվեարկելու իրավունք ունի

ՀՀ-ում սահմանադրության փոփոխությունների հանրաքվեին մասնակցելու իրավունք ունի կալանավորված 958 անձ, որից 673 –ը՝ «Նուբարաշեն» քրեակատարողական հիմնարկում: Դեկտեմբերի 3-ին կազմվել է հանրաքվեին մասնակցելու իրավունք ունեցող կալանավորված անձանց ցուցակը: Այսօր հանրաքվեի կենտրոնական հանձնաժողովի տեղեկատվական կենտրոնում ասաց ՀՀ արդարադատության նախարարության քրեակատարողական ծառայության կազմ-վերլուծական և միջազգային համագործակցության բաժնի պետ, արդարադատության փոխգնդապետ Հայկ Քոչինյանը:

Նա նաև նշեց, որ հանրաքվեի անցկացման համար ՀՀ-ում ձևավորվել է 1997 տեղամաս, որից 8-ը քրեակատարողական հիմնարկներում են: «Նուբարաշեն» քրեակատարողական հիմնարկում քվեարկությունը սկսվել է 11:00-ին, իսկ «Վարդաշեն», «Երևան-Կենտրոն», «Աբովյան», «Արմավիր», «Վանաձոր», «Արթիկ», «Գորիս» ՔԿՀ-ներում՝ 17:00-ին: 21 կալանավորված անձ «Դատապարատյալ հիվանդանոց» ՔԿՀ-ից տեղափոխվել է «Նուբարաշեն» ՔԿՀ և մասնակցել քվեարկությանը: Ժամը 18:30-ի դրությամբ քվեարկել է 825 կալանավորված անձ:

Ըստ Հ. Քոչինյանի, ՔԿՀ-ներում քվեարկության ընթացքին, հանձնաժողովի նիստերին հետևելու համար «Նուբարաշեն» ՔԿՀ են այցելել Եվրոպայի խորհրդի միջազգային դիտորդներ: