Ոստիկանությունն ստացել է ահազանգեր ընտրախախտումների վերաբերյալ

Ոստիկանության պետի աշխատակազմի ղեկավար, ոստիկանության փոխգնդապետ Մերուժան Հակոբյանը քիչ առաջ լրագրողներին ներկայացրեց ոստիկանություն ստացված ահազանգերի վերաբերյալ տեղեկություն:

Նա հայտնեց, որ մինչև հանրաքվեի մեկնարկը ոստիկանությունն ստացել է 25 ահազանգ, որոնք հիմնականում ստացվել են ԶԼՄ-ից, նրանցից 7-ը վերաբերվել են ընտրակաշառքներին, 9-ը՝ ընտրական իրավունքի իրականացմանը խոչընդոտելուն, 2-ը՝ հանրահավաք կամ քարոզարշավը խոչընդոտելուն, 1-ը՝ ընտրացուցակների անճշտություններին, 1-ը՝ կողմերի միջև ընդհարման մասին, և 1-ը տեղեկություն ընտրողների թվաքանակի վերաբերյալ:

Ըստ աղբյուրի, 3 ահազանգերի առնչությամբ կայացվել է քրեական գործի հարուցումը մերժելու որոշում, մեկը՝ քննարկման համար ուղարկվել է ՀՀ ոստիկանության անձնագրային ու վիզաների վարչություն, 17 դեպքով կատարվում քննություն:

Ինչ վերաբերում է բուն ընտրախախտումների վերաբերյալ ահազանգերին, ապա, ըստ Մերուժան Հակոբյանի, հանրաքվեի մեկնարկից հետո ոստիկանությունը ընտրախախտումների վերաբերյալ ստացել է 4 ահազանգ, 27 դեպքի մասին տեղեկացել է ԶԼՄ-ից, որոնցից 5-ը քվեարկելուն ուղղորդելու դեպքերն են, 4-ը լրագրողական գործունեության խոչընդոտման վերաբերյալ դեպքեր, 4-ը՝ դիտորդական առաքելության խոչընդոտման, 3-ը՝ ընտրակաշառքի փորձի վերաբերալ: