Անդրանիկ Քոչարյանը Ադրբեջանի հացն է ուզում ուտել

Ազգային ժողովի «Իմ քայլը» խմբակցության պատգամավոր Անդրանիկ Քոչարյանը, որը նաև խորհրդարանի Անվտանգության և պաշտպանության հարցերի հանձնաժողովի նախագահն, այսօր խորհրդարանում հանդես է եկել հային մորթող Ադրբեջանի հետ համակերպվելու ու համակեցության կանոններով ապրելու մասին։

«Անհրաժեշտ է ինքներս մեզ հետ ազնիվ լինենք ու ընդունենք պարտությունը։ Պետք է հասկանալ, որ կատարվածն այլ կերպ հնարավոր չէ անվանել և որ պարտվել ենք թե՛ ռազմի դաշտում, թե՛ բարոյապես, թե՛ հոգեպես։

Հասկանալի է, որ պարտված լինելու փաստը լրացուցիչ բարդույթներ է առաջ քաշելու, սակայն պետք է հնարավորինս արագ դուրս գալ բարոյալքված վիճակից ու քայլեր նախաձեռնել։

Հաջորդ քայլը պետք է լինի պատասխանատվության աստիճանական գիտակցումն ու ընկալումը։

Ի վերջո, պետք է փորձել երկխոսություն սկսել հաղթող կողմի հետ, որքան էլ դա ծանր լինի։ Խոշոր մասշտաբների պատերազմներից վերականգնված գրեթե բոլոր երկրներն անցել են այս ճանապարհով», - ասաց Անդրանիկ Քոչարյանը։

Պատգամավոր Քոչարյանը նաև ասաց, որ երկկողմ դիվանագիտական հարաբերությունների հաստատումը կարող է փոխել սպասվող հեռանկարները և դիվանագիտությունը պետք է հիմնված լինի տնտեսական, ռազմական և բարոյահոգեբանական բոլոր հնարավոր ռիսկերի գնահատման վրա։

Եթե կարճ ձևակերպենք Անդրանիկ Քոչարյանի ասածը, դա նշանակում է, որ իշխանության կարկառուն ներկայացուցիչ Անդրանիկ Քոչարյանը Հայաստանին առաջարկում է հաշտվել Ադրբեջանի հետ, հիշել, որ Ադրբեջանը մեծ շուկաներ ունի, որ մենք կարող ենք տնտեսապես գոյատևել, եթե առևտուր անենք Ադրբեջանի հետ։

Անդրանիկ Քոչարյանն իր թիմով Արցախը ծախելուց, Շուշին ադրբեջանցիներին նվիրելուց հետո հիմա առաջարկում է Հայաստանի հանապետության քաղաքացիներին, որի կազմում են մտնում ինչպես պողոսներն ու զոմբիները, այնպես էլ արժանապատիվ հայերը, առևտուր անել Ադրբեջանի հետ, Հայաստան ներմուծել ու արտահանել ադրբեջանական ապրանք, այն Ադրբեջանի, որի զինվորը կենդանի-կենդաի հայ է մորթում, որի զինվորը գլխատում է հայ զինվորին ու այդ գլխով ֆուտբոլ խաղում, այն Ադրբեջանին, որը անմարդկային տանջանքների է ենթարկում հարյուրավոր հայ գերիների, այն Ադրբեջանին, որը կրակում է այն զինվորների ուղղությամբ, որոնք փորձում են գրավված տարածքներից դուրս բերել 50 օր այդ տարածքում ընկած հայ զինվորի մարմնի մնացորդները։

Անդրանիկ Քոչարյանը հայ մորն առաջարկում է առևտուր անել այն Ադրբեջանի հետ, որին հայ մայրն անգամ չի թողել իր նորածին որդու գերեզմանը ու Արցախից գաղթելուց մատներով փորել է հողը ու զավակի շիրիմն իր հետ բերել Հայաստան։

Սրա համար էի՞ք Արցախը ծախում Արդբեջանին, սրա համա՞ր, որ այսօր առևտուր անեք հային մորթողի հետ։ Անդրանիկ Քոչարյանին որևէ բանով չենք ցանկանում հակադարձել, պարզապես ասում ենք, եթե ուզում ես ուտել հայ մորթող Ադրբեջանի հացը, գնա Ադրբեջան ու կեր։

NewsPress.am