Լոռու մարզպետը «փայ է մտնում» նաև զոհվածների լուսանկարների՞ գումարից․․․

Արդեն քանի օր է համացանցում շրջանառվում են լուսանկարներ և ներկայացվում են փաստեր, որոնք բաց տեքստով մեղադրում են Լոռու մարզպետ Անդրեյ Ղուկասյանին՝ ուղարկված օգնության յուրացման մեջ։

Իհարկե Ղուկասյան Անդրեյի բախտը բերել է այնքանով, որ ինքը, ոչ թե մինչիշխանափոխական, այլ հետհեղափոխական շրջանի ղեկավար է․ այսինքն՝ չի համարվում նախկին, ինչպիսին էր օրինակ գեներալ Մանվել Գրիգորյանը, ում տարիների պայքարն ազերիների դեմ նույնիսկ հաշվի չառան, երբ դաշտ նետվեց տեղեկատվություն, թե նա զինվորներից «տուշոնկա է գողացել»․․․․

Գողացել էր, թե ոչ՝ այդպես էլ չպարզվեց մինչև վերջ, բայց դա չխանգարեց նկարել ու խայտառակել ազերիների համար ահ ու սարսափ ներկայացնող գեներալին։

Ղուկասյան Անդրեյի մասով՝ համակ լռություն է, ոչ մի արձագանք․․․

Այս մասին տեղեկատվություն գրելիս ֆեյսբուքյան օգտատերը մանրամասն փաստեր է ներկայացրել․ կան լուսանկարներ, կան փաստաթղթեր, կան էլի ապացույցներ, բայց մեղադրանքը հաստատելու համար քայլ անգամ չի արվում․․․  

Ավելին՝ նորիշխանական մարզպետը կեղտոտ խաղ է սկսել․ նա ֆեյքերի ու յուրայինների միջոցով դաշտ է նետել տեղեկություն, թե իբր Գերմանիայից ուղարկված ապրանքները գողացված են։ 

Բայց օգտատերը նրա այս արձագանքին էլ է պատասխանել և հրապարակել փաստաթղթեր, որոնք ապացուցում են, որ ոչ մի կտոր բեռ գողացված չէ, և ամեն նչ օրնական ճանապարհով է արված (օգտատիրոջ հրապարակած փաստաթղթերը՝ ստորև)․․․

Բացի այն, որ մարզպետը կարողանում է  զինվորի օգնությունը յուրացնելու մասին իրեն ուղղված մեղադրանքների հոսքին հակառակ քայլել ու գոնե առայժմ ջրից չոր դուրս գալ, նա նաև, ըստ մեր տեղեկություների, փողերի լվացմամբ է զբաղվում՝ դարձյալ շահարկելով զինվորի անունը։

NEWSPRESS.am-ի տեղեկություններով, զոհված զինվորների լուսանկարների պատրաստման համար, մարզպետարանը պայմանավորվածություն է ձեռք բերել կոնկրետ լուսանկարչի հետ, ում պետք է մարզպետարանից փոխանցվեն գումարներ՝ ամեն մի լուսանկարի համար։

Մեր տեղեկություններով, լուսանկարչի հետ ներքին պայմանավորվածությամբ, յուրաքանչյուր լուսանկարի համար դուրս է գրվում ավելի շատ գումար, քան իրականում ստանում է լուսանկարիչը։ Ասել է թե, մարզպետարանը «փայ է մտնում»՝ զոհվածների լուսանկարների հաշվին․․․․

Եվ սա այն մարզպետն է, ով իր պաշտոնավարման առաջին օրերից քիթը խոթել էր իրավական դաշտ՝ փորփրելով ու իբր կոռուպցիոն բացահայտումներ անելով։

Ու հիմա, երբ կոնկրետ իրավապահները պետք է զբաղվեն իր անվան հետ կապված կոռուպցիոն բացահայտուներով, չգիտես ինչու, դեռ եչ մի շարժ չկա․․․