ՎՏԲ բանկի անփութության պատճառով քաղցկեղով հիվանդ ՊՆ նախկին աշխատակցուհին զրկվել է իր հասանելիք կենսաթոշակից

Վարդանուշ Կիրակոսյանը, ով 2014 թվականից պայքարում է իր հիվանդության՝ ծորանային քաղցկեղի դեմ` խնդիրներ ունի ՎՏԲ բանկի հետ: 

Նա Newspress.am-ի հետ զրույցում նշեց, որ դեկտեմբերի 4-ին չի կարողացել ստանալ իր հասանելիք կեսաթոշակը: Կնոջ խոսքով, ՎՏԲ բանկից պատճառաբանել են, թե սկզբից իբր մեկ օր ուշացումով է զինվորական կեսաթոշակառունների թոշակը նստում հաշվեհամարին։

«Ես իրենց ասացի, որ ես զանգել եմ ՎՏԲ կենտրոնական բանկ և ձայնային ազդանշանի մեջ ասվում է, որ կենսաթոշակները փոխանցվել են, նաև բանկի աշխատակիցն է ասել, որ փոխանցվել է։ Հետո պարզվում է, որ բանկը պետք է ինձ հաղորդագրությամբ, զանգով կամ հիշեցման թերթիկով հիշեցում տար իմ ստորագրության վավերականացումը թարմացնելու համար, որտեղ ՎՏԲ բանկը թերացել է իր պարտականությունների մեջ և ես այսօր զրկվել եմ իմ հասանելիք ամսեկան կենսաթոշակից»,- մեզ հետ զրույցում պատմում է կինը։

Խնդիրը տեղում հարթվել է այնքանով, որ բանկում թարմացրել են ստորագրության վավերականացան ժամկետը  (խոսքը չի վերաբերվում այն քարտին, որով բանկոմատից նա գումար է ստանում, դա մինչև 2024թ. վավեր է)։ Սակայն խնդիրն այն է, որ բանկի թերացման պատճառով կինը պետք է մեկ ամսի մնա առանց գումարի

«ՊՆ սոց.վարչություն էլ եմ զանգել և ինձ ասացին, որ դա բանկի խնդիրն է, որ պետք է տեղյակ պահեր, լավագույն դեպում՝ հունվարին կրկնակի կստանամ։ Լավ հիմա ինչպե՞ս եմ գոյատևելու, երբ միակ իմ ապրուստի միջոցն էր դա»,- նկատում է Վարդանուշ Կիրակոսյանը:

Հիշեցնենք, որ  Վարդանուշ Կիրակոսյանը քաղցկեղ հիվանդությունը ձեռք է բերել  ՊՆ աշխատելու տարիներին, որտեղ նա եղել է 20 տարուց ավելի։

1993 թվականին զորակոչվել է հայկական ԶՈւ, հետագայում հեռախոսավարուհի է աշխատել ՀՕՊ զորքերում, իսկ 2001 թվականից պայմանագրային զինծառայող է։ Նա պատմում է․ նախկինում, երբ ՀՕՊ ստորգետնյա զորամասերում ռուսներ էին ծառայում, վնասակար պայմաններում աշխատելու համար զինծառայողներին մածուն, հանքային ջուր էին տալիս, այլ արտոնություններ էին սահմանված։

Հետագայում բոլոր արտոնությունները վերացան։

Արմինե Մկրտումյան