Պատերազմը հնարավոր էր կանգնեցնել 3րդ-4րդ օրը, երբ ունեինք ընդամենը 3֊4 կմ տարածքի կորուստ և մոտ 500 զոհ. Ռոբերտ Քոչարյան. VIDEO

Այն ինչ կատարվեց, այն ինչ տեղի ունեցավ, դա ուղղակի չի տեղավորվում իմ ուղեղում։ Այս մասին հայտարարեց ՀՀ երկրորդ նախագահ և Արցախի առաջին նախագահ Ռոբերտ Քոչարյանը` «5-րդ» ալիքի եթերում: Նա նշեց, որ եթե ինքը լիներ վարչապետի փոխարեն, պատերազմը չէր սկսվի: 

Ինչ վերաբերվում է արդեն այս պատերազմին, ապա, ըստ ՀՀ երկրորդ նախագահի, այն հնարավոր էր կանգնեցնել 3րդ-4րդ օրը, երբ Գենշտաբից զեկուցել են իրավիճակի մասին, երբ ունեինք ընդամենը 3֊4 կմ տարածքի կորուստ և մոտ 500 զոհ:

«Պատերազմը կանգեցվեց 44-րդ օրը, մի քանի հազար զոհ ունենալուց հետո, ավելի քան տասը հազար վիրավոր ունենալու հետո և վատագույն սցենարով։ Տարածքները կորցնելուց հետո, առանց որևէ հեռանկարի՝ կարգավիճակը քննարկելու առումով: Չկա ոչ մի բան ֆիքսած: Կրկնում եմ, սա ուղղակի չի տեղավորվում իմ ուղեղում: Ինչո՞ւ չես կանգնեցրել պատերազմը չորրորդ օրը, երբ արդեն քո զինվորականները քեզ ասում էին՝ մենք անխուսաելիորեն պարտվում ենք»,– ասաց Ռոբերտ Քոչարյանը:

Դիտարկմանը, թե Փաշինյանն ասում էր, որ այդ ժամանակ իրեն դավաճան կանվանեյին, Ռոբերտ Քոչարյանը նկատեց, որ Փաշինյանն իր հորինած ստերի գերին էր դարձել։

«Առաջին օրից, սուտը բանակը չէր տարածում, Արծրունն էր հնչեցնում զինվորական հագուստով, այդ սուտը ես գիտեմ որտեղ էր պատրաստվում։ Հիմա պատկերացրեք, եթե ժողովուրդը իմանար, թե ինչ էր կատարվում, եթե իմանար, որ պարտվում է, եթե իմանար զոհերի իրական թիվը, չէր ասի, որ սա դավաճան է, կասեր՝ ճիշտ որոշում կայացրեց և ճիշտ պահին, բայց երբ որ քո ամբողջ քարոզչական մեքենան ասում է, որ մենք հաղթում ենք, մենք Գետաշենում ենք, մենք Շահումյանում ենք և այդ հաղթարշավի մեջ գտնվող երկրի ղեկավարը հանկարծ ասում է՝ հոպ, զիջումներով մի պայմանագիր է ստորագրում, իհարկե՝ ասելու էին դավաճան է:

Քեզ ասելու են դավաճան, որովհետև դու հորինել ես մի հեքիաթ, որը իրականության հետ կապ չուներ և ամբողջ երկիրը գերի է դարձել քո ստերին, դու ինքնդ ես գերի դարձել քո ստերին: Մեկ սուտը ծնում է մեկ ուրիշ սուտ, մեկ ուրիշ սուտ ծնում է մեկ ուրիշը, դա հայտնի բան է: Ինձ հասկացաք»,-ասաց Քոչարյանն ու նկատեց, որ այն ժամանակ մարդիկ ավելի լավ կհասկանային նրա քայլը, հատկապես, որ նույն բանն արեց։