Արման Բաբաջանյանի, Ամանորի ու թուրքի ծիծաղի մասին

Երեւանի քաղաքապետարանն այսօր տեղեկացրեց, որ այս տարի Ամանորը մայրաքաղաքում չի նշվելու, որեւէ տոնական միջոցառում, տոնածառ, փայլ եւ լույս չի լինելու քաղաքում:

Պատերազմում ջախջախիչ պարտություն կրած երկրի համար ամանորյա տոները չեղարկելու որոշումը տեղին է, ավելին այն անհրաժեշտ է:

Հազարավոր զոհեր ունենք, տասը հազար գերազանցող հաշմանդամներ, գերիներ ու թշնամու գրաված տարածքներում մինչ այս պահը ընկած հայ զինվորի դիակներ: Նրանց բոլորի ընտանիքների ցավը պետք է լինի բոլորինս, որովհետեւ այդ տղաները պաշտպանում էին բոլորիս, բայց արի ու տես, որ այս գիտակցմամբ չի առաջնորդվում Արման Բաբաջանյանը:

Ազգային ժողովի անկախ պատգամավորը կարծում է, որ ամանորյա տոնական միջոցառումները մեզ ոչ թե պետք են, այլ անհրաժեշտ են, որ թուրքի մոտ խայտառակ չլինենք ու որ թուրքը մեզ վրա չծիծաղի:

Այստեղ պետք է պատգամավորին հիշեցնել, որ թուրքը մեզ վրա ծիծաղում է այն օրվանից, երբ Ձեր սիրելի վարչապետ Նիկոլ Փաշինյանը Ադրբեջանին հանձնեց Արցախի մեծ մասը, Շուշին, Հադրութը, Լաչինի միջանցքը հենց այն ժամանակ, երբ այդ հողը պահելու համար թափվում էր հազարավորների արյունը:

Արման Բաբաջանյան, թուրքը մեզ վրա ծիծաղում է այն պահից, երբ Ձեր նախընտրելի ժողովրդավարության առաջնորդ եւ թավշա պաշտոնյան Դուշանբեի վերելակում գործարք կնքեց Ալիեւի հետ:

Արման Բաբաջանյան, թուրքը մեզ վրա ծիծաղում էր այն ժամանակ, երբ Աննա Հակոբյանը սմարթֆոնը ձեռքին կանգնած էր մարտական քարտեզի գլխին: Ամանորը չնշելը մեր պարտավորությունն է, մեր հարգանքի տուրքը, իսկ ամեն մի փայլի ու տոնածառի համար ծախսվող գումարը պետք է ուղղել զինվորի ընտանիքին: Իսկ եթե Դուք, պարոն պատգամավոր, ամաչում եք, ապա կարող եք ձեր տան բակում մի տոնածառ տեղադրել ու սկսել ձեր կյանքը նոր էջից, փակեք Ձեր նախընտրելի վարչապետ Փաշինյանի բերած մահաբեր 2020 թվականը: