Կարտոֆիլի տխուր տարին և ԱՎԾ ուրախ ցուցանիշները

Հայաստանի հանրապետության գյուղատնտեսության նախարար Սերգո Կարապետյանի ներկայացրած ցուցանիշները շատ հաճախ քննարկման կարիք ունեն:Մինչ գյուղնախարարը հայտարարում է, թե ցանքատարածություններն ավելացել են, մեկ հա-ից 60 տոննա կարտոֆիլ է ստացվել  և այս տարի արտադրվել է 800 000 տոննա կարտոֆիլ, գյուղի մշակներն այլ բան են փաստում:

Գեղարքունիքի մարզի Վարդենիկ գյուղում օրինակ բնակիչներն ահազանգում են. այս տարի կարտոֆիլի բերքը կրկնակի կրճատվել է:

newspress.am-ի հետ զրույցում Վարդենիկի գյուղապետարանից հայտնեցին, որ այս տարիգյուղում մշակվել է ընդհանուր վարելահողերի շուրջ 70 տոկոսը:

Հայաստանում տարեկան միջինում արտադրվում է միջինում 600 հազար տոննա կարտոֆիլ, որից ներքին սպառմանը բաժին է ընկնում 400-450 հազար տոննան: Ավանդաբար, ելնելով կլիմայական բարենպաստ պայմաններից Հայաստանի կարտոֆիլի արտադրության շուրջ 50 տոկոսը բաժին է ընկնում Գեղարքունիքի մարզին:

Համայնքը ֆերմերներից Արմեը newspress.am-ի հետ զրույցում նկատեց, որ  այս տարի երաշտային էր և մեկ հա-ից ստացել են 17-18 տոննա կարտոֆիլ, իսկ 2014թ-ին՝ 30 տոննա. «բերքի կրկնակի կրճատումը կապված է երաշտի հետ: Կողքի գյուղում էլ բերք չեն ստացել: Ով հնարավորություն ունի ջրեց, պարարտացրեց, ասում են լավ էլ բերք է ստացել, ով չկարողացավ, փող չուներ մշակելու, բերքը քիչ էր»,- ասաց նա:

«Եթե տարին չորային չլիներ, լավ բերք կստանայինք»,- ասաց Վարդենիկ համայնքի բնակիչ Վարդանը` հավելելով, որ մոտավոր հաշվարկներով մեկ հա-ից 20 տոննա բերք է ստացել:
Հարցին, թե ինչպես են իրացնում, պատասխանեց, որ ունեն իրենց հաճախորդները. գալիս կարտոֆիլը տանում են, սակայն կան, մարդիկ, որ կարտոֆիլը պահում են հորերում՝ հուսալով ավելի ուշ թանկ վաճառել. «Այժմ մեկ կգ-ի համար 120 դրամ են վճարում, իսկ 2014թ-ին վճարում էին 200 դրամ»:
«ՙԱնցած տարի կարտոլը դուրս էին տանում, գինը բարձր էր, էս տարի չեն տանում, դրա համար էլ գինն ընկել է: Դե մենք փոխանակում ենք անում, բայց դե էդքան կարտոլ չկա, որ փոխանակենք, ես մի քիչ ցորենի հետ եմ փոխանակել, էս տարի ցորենն էլ էր վատ: Կարտոլը մի կերպ ջրեցինք՝ կարացանք փրկել, իսկ ցորենը չկարացանք ջրել, ջուր չկար, շատ քիչ բերք ստացա»,- ասաց Վարդանը:

Հիշեցնենք, որ այս տարի գյուղոլորտի պաշտոնական շրջանակներում ներկայացվեց առավել համեստ մեկ հա-ից 400-450 ց, իսկ ՀՀ գյուղնախարար Սերգո Կարապետյանը ավելի լավատես էր մեկ հա-ից 600 ցենտներ:

Իսկ ԱՎԾ-ի տվյալներով` այս տարի արտադրվել է 800 000 տոննա կարտոֆիլ, ու կարտոֆիլի ցանքատարածություններն ավելացել են 10 տոկոսով: