Մարտակերտում գազամատակարարման վերականգնման ուղղությամբ աշխատանքները շարունակվում են

Արցախում 44-օրյա պատերազմի ընթացքում հրթիռահրետանային հարվածներից վնասվել են նաև գազատար խողովակները և հիմնականում, անվտանգության նկատառումներից ելնելով, դադարեցվել էր գազամատակարարումը: Այս մասին զրույց ունեցանք «Արցախգազ» ՓԲԸ-ի Մարտակերտի արտադրաշահագործման տեղամասի պետ Սասուն Առաքելյանի հետ:

Նշենք, որ Մարտակերտի շրջանում կա գազաֆիկացված 11 համայնք և 1 բնակավայր, որոնք ևս տուժել էին հրթիռահրետանային հարվածներից: Սասուն Առաքելյանն անդրադարձ կատարեց պատերազմի ընթացքում գազամատակարարման խնդիրներին, նշելով, որ հրթիռահրետակոծության հետևանքով վնասվել էին Մարտակերտ քաղաքի, Աղաբեկալանջ, Ծաղկաշեն, Ներքին Հոռաթաղ գյուղերի գազատար խողովակները և դադարեցվել էր գազի մատակարարումը:

Նրա խոսքով՝ Աղաբեկալանջ գյուղում համայնքի ղեկավար Հովիկ Սաիյանի օգնությամբ գազատար խողովակներն արդեն ամբողջությամբ վերանորոգվել են և անխափան գազամատակարարումը վերականգնված է: Մարտակերտ քաղաքում դեռևս գազամատակարարումն իրականացվում է մոտ 20 տոկոսով: Մարտակերտի արտադրաշահագործման տեղամասի պետն ընդգծեց, որ առաջնահերթ աշխատանքներն են իրականացվել շրջանային բուժմիավորման ջեռուցման համար գազամատակարարումը վերականգնելու ուղղությամբ, ինչպես նաև վերականգնվել է «Կաթնաբերդ» ՍՊԸ-ին պատկանող հացի փուռի գազամատակարարումը, աշխատանքներ են ընթանում քաղաքում գործող մնացած ընկերությունների անխափան գազամատարակարման համար: Ընթացքի մեջ է նաև Ներքին Հոռաթաղի, Ծաղկաշենի գազատարների վնասված խողովակների վերականգնման աշխատանքները: Ս.Առաքելյանը հավաստիացրեց, որ կարճ ժամանակահատվածում նշված երկու գյուղում գազամատակարարումը կվերականգնվի:

Մարտակերտի շրջանում պատերազմի ընթացքում անխափան գազ է մատակարարվել Վանք, Գառնաքար, Ծմակահող, Շահմասուր, Առաջաձոր, Չլդրան գյուղերում և Ղազարահողեր բնակավայրում: Դրմբոնում ավտովթարի հետևանքով 13 տուն ներկա դրությամբ գազազրկված է վթարավերականգնողական աշխատանքների իրականացման նպատակով: Հրթիռակոծության հետևանքով Գետավանում մոտ 3 անգամ վնասվել են գազատար խողովակները, որոնք կարճ ժամանակում վերականգնվել են: Այդ ողջ ընթացքում հատուկ ուշադրություն է դարձվել «Ակնաբերդ» ՍՊԸ-ին պատկանող ԱԳԼՃԿ-ի և «Առաքյալ» ՍՊԸ-ի հացի փռի, որտեղ զինծառայողների համար հաց էր թխվում, անխափան աշխատանքի ապահովմանը: Այսօրվա դրությամբ ընկերության ներուժն ուղղված է Մարտակերտ քաղաքում գազատարների վերանորոգման աշխատանքների վրա, Ս.Առաքելյանը վստահեցրեց՝ մենք ամեն ինչ անում ենք, որպեսզի հնարավորինս սեղմ ժամկետում բնակչությանը տրամադրվող բնական գազի մատակարարումն ամբողջությամբ վերականգնվի: Աշխատանքները բավականին բարդ են ու ծանր, քանի որ չկա այնպիսի մի թաղամաս, որտեղ վնասված չլինեն խողովակները: Այդ աշխատանքներին աջակցում են նաև Ստեփանակերտից՝ «Արցախգազ» ՓԲԸ-ից խմբեր են ուղարկվում, որպեսզի կցվեն իրականացվող վթարավերականգնողական աշխատանքներին: «Արցախգազ» ՓԲԸ-ի տնօրենության և Մարտակերտի շրջվաչակազմի հետ համատեղ աշխատանքների արդյունքում վերականգնվել է հրթիռահրետակոծությունից վնասված Չլդրան-Մարտակերտ հիմնական սնուցող գազատարը, որը ներկա դրությամբ շահագործվում է և Մարտակերտ քաղաք նոյեմբերի 13-ից գազամատակարարում է իրականացվում:

Սասուն Առաքելյանը, անդրադառնալով առկա խնդիրներին ու խոչընդոտներին, նշեց, որ ընկերությունը Մարտակերտի շրջվաչակազմի ղեկավար Հայկ Բախշիյանի աջակցությամբ ջանք չի խնայում խնդիրների լուծման համար, իսկ աշխատանքի ընթացքում հիմնական խոչընդոտները կայանում են նրանում, որ կան մարդիկ, ովքեր դեռևս չեն վերադարձել և տների դռները փակ վիճակում են, իրենց մասնագետները նախքան գազմատակարարումն իրականացնելը հաշվիչը փականներից փակում են ապահովության համար, այդ պատճառով բնակիչներին հորդորվում է, վերադառնալով իրենց բնակարաններն ու տներն, անմիջապես տեղեկացնեն ընկերության մասնագետներին, ներկայանալով գրասենյակ կամ 1-04 շուրջօրյա հեռախոսահամարով զանգահարել, որպեսզի համապատասխան մասնագետները ստուգեն ներտնային ցանցը, որից հետո միայն օգտնվեն գազամատակարարումից: Հատկապես բազմաբնակարան շենքերում, որտեղ վթարների հնարավոր դեպքերը ավելի շատ են անվտանգության տեսանկյունից «Արցախգազ» ՓԲԸ-ին դիմելը շատ կարևոր է:

Ջրաբերդ պաշտոնաթերթ