Տեսա՞ք, որ երեկ հավաքված մարդկանց հետ միայն վարչապետը կարողացավ խոսել․ նրա գործոնը կայունացնող է․ Լենա Նազարյան

«Մենք հիմա չունենք Կառավարությունից որևէ ազդակ, որ ռազմական դրությունը պետք է չեղարկվի, հետևաբար՝ մենք չեն մասնակցելու այդ նիստին»։ Այս մասին ասուլիսի ժամանակ հայտարարեց ԱԺ փոխնախագահ Լենա Նազարյանը՝ նշելով, որ ռազմական դրության վերաբերյալ նախագիծը խորհրդարան էր բերել կառավարությունը, և այն ընդունել են Կառավարության գնահատականով և որոշմամբ։

Անդրադառնալով ՌԴ նախագահ Վլադիմիր Պուտինի հայտարարությանը, որ նոյեմբերի 10-ից առաջ վարչապետին ավելի լավ առաջարկ է եղել հրադադարի, սակայն Փաշինյանը մերժել է, Լենա Նազարյանն ասաց․

«Ռազմաքաղաքական ղեկավարությունը մտածել է, որ Շուշիում կունենանք ռազմական հաջողություն, սակայն դա տեղի չի ունեցել, և այդ պահից սկսած հասկացել են, որ հնարավոր չէ ունենալ ռազմական հաջողություն, և այդ իրավիճակում յուրաքանչյուր հաջորդ զոհ չէր լուծելու որևէ ռազմական խնդիր։ Եթե այն ժամանակ՝ հոկտեմբերի 19-20-ին, Հայաստանը և Արցախը համաձայնվեր, որպեսզի Շուշի վերադառնային փախստականներ, այսօր մեզ մեղադրելու էին Շուշին հանձնելու մեջ, հիմա էլ են մեղադրում, բայց Շուշին գրավեցին, ոչ թե հանձնեցինք»,- շեշտեց Լենա Նազարյանը։

Ինչ վերաբերվում է վարչապետի հրաժարականի պահանջներին, ապա Լենա Նազարյանը հայտնեց, որ այդ տարբերակն իրենց համար ընդունելի չէ. «Որքան էլ պարադոքսալ հնչի, բայց այս իրավիճակում հենց Նիկոլ Փաշինյանն է կայունացնող գործոնը։

Տեսա՞ք, որ երեկ Հանրապետության հրապարակում հավաքվել էին մարդիկ՝ ի աջակցություն վարչապետի, և միայն վարչապետը կարող էր խոսել և խոսեց այդ մարդկանց հետ՝ հորդորեց գնալ տուն և չլարել վիճակը։ Չեմ պատկերացնում՝ որևէ մարդ, այլ ղեկավար կարող է կայունացնել վիճակը։ Նիկոլ Փաշինյանի գործոնն այս իրավիճակում ավելի շատ կայունացնող է, քան ապակայունացնող, ոչ, վարչապետի այլ թեկնածու չեմ պատկերացնում»,- եզրափակեց նա։