Հասկանալի է, թե ինչու է շտապում Ալիևը, իսկ հասկանո՞ւմ եք, թե ինչու է այդպես շտապում Նիկոլը. ռազմական փորձագետ

Այս մասին  Razm.info կայքի համակարգող, ռազմական փորձագետ Կարեն Վրթանեսյանը ֆեյսբուքյան իր էջում գրել է.

«Ի՞նչ եք կարծում, ինչո՞ւ են այսպիսի աբսուրդ կարճ ժամկետների համաձայնել Նիկոլը զորքը դուրս բերելու համար, որ մարդիկ նույնիսկ չեն հասցնում իրենց ունեցվածքը տեղափոխել ՀՀ։ Նոր շատ դիպուկ, շատ սրամիտ մի կատակ տեսա այս իրավիճակի մասին, ժպտացի, հետո միանգամից հիշեցի, որ երեկ ընկերս Արցախում իր հոր կառուցած տունն էր հրդեհում՝ մեջի եղած-չեղածով, որ չմնա թուրքի փայ դառնա... Ժպիտս սառեց։

Հիշեցի այն հազարավոր դոլարները, որ միայն իմ միջոցով է հավաքվել, ուղարկել Արցախ, որ մեկը հող ցանի, մյուսն իր տունը կառուցի, երրորդն անասուն առնի, պահի, չորրորդը՝ տեղի երեխեքի համար մի ուսումնական ծրագիր անի։ Հիշեցի այն հազարավոր գրքերն ու դասագրքերը, մարզական գույքը, որ ազատագրված շրջանների դպրոցներ էինք ուղարկում։

Չեմ պատկերացնում, թե հիմա ինչ են զգում մարդիկ, որ միլիոնավոր դոլարների ներդրումներ են արել Արցախի ազատագրված տարածում. հյուրանոցներ, հիվանդանոցներ, դպրոցներ, մանկապարտեզներ ու ճանապարհներ կառուցել, եկեղեցիներ վերականգնել, Տիգրանակերտ պեղել, էլ ո՞րն ասես։ Տասնյակ միլիոններ տվել դիրքերը կահավորելու համար, զենք բերելու համար։

Պետության արած ահռելի ծախսերը չհաշված...

Ի՞նչ եք կարծում, ինչո՞ւ են այսպիսի աբսուրդ կարճ ժամկետների համաձայնել Նիկոլը զորքը դուրս բերելու համար, որ մարդիկ նույնիսկ չեն հասցնում իրենց ունեցվածքը տեղափոխել ՀՀ, չեն կարողանում նույնիսկ իրենց անասունը բերել, որ թեկուզ մորթեն, ձմեռվա համար ղաուրմա դնեն, սովից չմեռնեն...

Քարվաճառում այսօր տղերք են դեռ կանգնած դիրքերում, պայմանագրայիններ, որ իջնելու են, նույնիսկ չհասցնեն տուն մտնել, իրենց ամենաանհրաժեշտ իրերը վերցնել հետները...

Հասկանալի է, թե ինչու է շտապում Ալիևը, իսկ հասկանո՞ւմ եք, թե ինչու է այդպես շտապում Նիկոլը»,-գրել է Կարեն Վրթանեսյանը։