«Հաղթաթեյ». երեք դպրոցական աղջիկներ թեյ վաճառելով կես մլն դրամ են աշխատել Զինծառայողների ապահովագրության հիմնադրամին փոխանցելու համար (ֆոտո)

Տաք «հաղթաթեյ». խմում եք դուք, «ջերմանում է» սահմանին կանգնած զինվորը: Երեք դպրոցահասակ աղջիկների՝ Անիի, Սեդայի ու Սիլվայի նախաձեռնությունն է, որ մեկնարկել է հոկտեմբերի 30-ից: Եղեգնաձորցի աղջիկները սահմանի համար տարբեր կամավորական աշխատանքների են մասնակցել, հետո որոշել սեփական նախաձեռնությունը սկսել:

Հեղինակներից Անին NEWSPRESS.am-ի հետ զրույցում պատմեց, որ սկզբում քննարկել են Հայաստանից ու Արցախից քաղված խոտաբույսերի վաճառք իրականացնելու տարբերակը, սակայն մտափոխվել են ու որոշել այդ բույսերով պատրաստած թեյը վաճառել:

«Առաջին ներդրումը մենք կատարեցինք, բայց առաջին իսկ օրվանից մեզ միացան շատ բարի մարդիկ, մեզ թեյ, սուրճ և այլ ապրանքներ տրամադրեցին»,- պատմեց Անին՝ նշելով, որ գնորդներից շատերը սուրճ են ցանկացել, իրենք էլ, առիթն օգտագործելով, սկսել են նաև սուրճ վաճառել:

«Առաջին օրն աշխատել ենք մոտ 70 000 դրամ. այդքան չէինք ակնկալում, շատ էինք ուրախացել: Առաջին գնորդն էլ մի կին էր, ում երկու տղաներն այսօր սահմանին են. դա էլ մեզ շատ ոգևորեց»,- նշեց Անին:

Նրա խոսքով՝ աշխատանքը սկսելու առաջին օրվանից իրենց են միացել այլ կամավորներ ևս, որ օգնում են հեշտացնել իր խոսքով՝ «քաղցր» բեռը:

«Այսօր նախաձեռնության 7-րդ օրն է, ու մենք հավաքել ենք մոտ 500 000 դրամ, որն ամբողջովին փոխանցելու ենք Զինծառայողների ապահովագրության հիմնադրամին: Սուրճը, թեյը գնում ենք մեր միջոցներով, կամ տրամադրում են այլ քաղաքացիներ, հետևաբար դրա համար ևս գումար չենք առանձնացնի»,- ասաց նա՝ նշելով, որ գնորդները հիմնականում Եղեգնաձորից ու հարակից համայնքներից են:

«Մարդկանց մեծամասնությունը, իմանալով, որ իրենց գումարը փոխանցվելու է Զինծառայողների ապահովագրության հիմնադրամին, նախատեսվածից՝ 1 բաժակ սուրճի կամ թեյի համար 300 դրամից ավելի շատ են վճարում՝ մինչև 20 000 դրամ»,- ասաց նա:

Անին նշեց, թե դեռ չեն որոշել՝ որքան կշարունակեն այս նախաձեռնությունը, բայց կփորձեն հնարավորինս շատ գումար աշխատել: