Միջին և ավագ դասարանների աշակերտները դասընթացները հեռավար կշարունակեն. ԿԳՄՍ փոխնախարար

Հայաստանում դպրոցների աշնանային արձակուրդից հետո դասերի վերականգնման մի քանի տարբերակ է քննարկվում: Այս մասին լրագրողների հետ առցանց ասուլիսում հայտարարեց ՀՀ կրթության, գիտության, մշակույթի և սպորտի փոխնախարար Ժաննա Անդրեասյանը:

«Ամենահավանական տարբերակը, որ այսօր ՀՀ առողջապահայության նախարարության հետ քննարկում ենք, այն է, որ առկա ուսուցում ապահովենք տարրական մակարդակում: Տարրական դպրոցի աշակերտները ֆիզիկապես կհաճախեն կրթական հաստատություն, և տեղերում ուսուցումը կկազմակերպվի»,- ասաց նախարարի տեղակալը:

Անդրեասյանի խոսքով՝ ինչ վերաբերում է միջին և ավագ դասարաններին, ապա առաջարկվում է գնալ տարբերակված մոտեցման:

«Որտեղ հանրային տրանսպորտ չի գործում, հիմնականում գյուղական և փոքր բնակավայրերում, իրավիճակային լուծում կկիրառվի: Եթե վարակի դեպքերի շեմը 10 տոկոսից ավելի է, ապա դպրոցը ժամանակավորապես հեռավար կգործի, այնուհետև կվերադառնա առկա ուսուցման: Եթե վարակի հետ կապված դեպքերը քիչ են, ապա կարող են առկա ուսումնական պրոցես սկսել»,-ասաց նա:

Փոխնախարարի խոսքով՝ հիմնական խնդիրը մեծ քաղաքներում է.

«Ամենայն հավանականությամբ միջին և ավագ դասարանների աշակերտները դասընթացները հեռավար կշարունակեն»,-ասաց նա:

Փոխնախարարը նշեց, որ բոլոր հարցերի հետ կապված այժմ քննարկումներ են ընթանում: Առաջիկայում վերջնական որոշումը պարզ կլինի: