Պարոն Բարսեղյան, գոնե Դուք պատմեք Ռուստամի գործերից, հասկացրեք, որ հերոսի կոչումը նա իր հետ չի տանելու՝ դա մարտական ընկերներին է պետք

Երեկ Արցախի նախագահ Արայիկ Հարությունյանը ֆեյսբուքյան իր էջում հայտնեց, որ «Արցախի հերոս» կոչում է շնորհել Սուրեն Բարսեղյանին։

Պարոն Բարսեղյանի մասին լսել եմ իմ լավ ընկեր, պատերազմում անմահացած Ռուստամ Գասպարյանից։ Գիտեմ, որ նրանք միասին փառահեղ մարտական ճանապարհ են անցել։ Շնորհավորում եմ պարոն Բարսեղյանին այս իրապես վաստակած կոչումն ստանալու կապակցությամբ։ 

Արդ, մեր նորօրյա հերոսին դիմում եմ արդեն պաշտոնապես՝ որպես ԵԿՄ փոխնախագահ և հարգված զինվորական. պարոն Բարսեղյան, Դուք լավ գիտեք, որ իմ ու Ձեր ընկեր Ռուստամը կյանքով մեկ հերոս էր, արածների մասին բարձրաձայնել չէր սիրում, բայց իսկապես ապրում էր ու զոհվեց հերոսին վայել ձևով։ Ինչո՞ւ Արցախի ղեկավարությանը գլխի չեք գցում, որ հերոսի կոչումը Ռուստամին տալը ոչ թե շռայլություն, այլ ուղիղ պարտականություն է Արցախի համար։ 

Ո՞վ գիտե, որ բացի մարտական գործողություններից, «Սև հովազի» հերոսական գործունեության շնորհիվ 100-ից ավել զինծառայողի կյանք է փրկվել։ Հերոսություն չէ՞։ Հերոսություն չէ՞ պատերազմ տանել որդիներին, եղբորը, եղբորորդիներին։ Տեսնել հարազատ որդու մահը ու զոհել սեփական կյանքը։ Ի՞նչն է դրանից մեծ հերոսություն։

Պարոն Բարսեղյան, Ռուստամը խոսել չէր սիրում, գոնե Դուք պատմեք նրա գործերից։ Հասկացրեք, որ էդ կոչումը Ռուստամն իր հետ չի տանելու, բայց գոնե ընտանիքի ու հարազատների համար կարող է ինչ-որ չափով սրտի մխիթարանք լինել, ինչպես նաև ուժ տալ մյուս հովազներին, որպեսզի արժանիորեն շարունակեն Ռուստամի ազնիվ ու սուրբ գործը։

Խորին հարգանքով ու սպասումով՝ Արիանա Հովսեփյան