Ամփոփվեցին քարոզարշավի 20 օրվա արդյունքները

Սահմանադրական փոփոխությունների «Այո և ոչ» իրապատման «Հյուսիս» և «Հարավ» ուղղության մասնակիցներն այսօր Երևանում ամփոփեցին քարոզարշավի 20 օրվա արդյունքները:

Արման Սաղաթելյանն ասաց, թե իր հիմնական հարցի լուծումը կա ինչպես նախագահական, այնպես էլ խորհրդարանական կառավարման համակարգում:

«Դա մեր անվտանգության հարցն է: Եվ քանի որ ես հիմա չունեմ ընտրություն՝ ընտրելու նախագահականի կամ խորհրդարանականի, այլ մենք խողովակի արանքում ենք, և կարող ենք միայն հետ գնալ, որն արդեն չենք կարող, կամ առաջ, ես ընտրում եմ առաջարկված խորհրդարանական մոդելը և կարծում եմ, որ սա իրոք կբերի մեր կայունության, ժողովրդավարության զարգացման, հասարակական սեկտորի կայացման և մեր անվտանգության ապահովման»,-ասաց Արման Սաղաթելյանը:

Վաղինակ Շուշանյանն ասաց, թե վերջին 20 օրերի համար իր համար պարզ է դարձել, որ հարցը ոչ թե սահմանադրական բարեփոխում անելը կամ չանելն է, այլ անվստահությունն այն մարդկանց նկատմամբ, ովքեր առաջ են քաշել սահմանադրության նախագիծը:

«Հասարակության մեծ մասին չի հետաքրքրում, իրենք կանցնեն խորհրդարանական, թե կիսանախագահական մոդելին, այլ հիմնական շեշտադրումը կատարում են նրա վրա, թե ովքեր են այս նախագիծն առաջ քաշել և մեծ մասամբ ասում են, որ իրենք «ոչ» են քվեարկելու, որովհետև նախագիծն առաջ է բերվել այդ մարդկանց կողմից»,- նշեց Վաղինակ Շուշանյանը:

Արծվիկ Մինասյանը շնորհակալություն հայտնեց բոլոր մասնակիցներին, նախաձեռնության հեղինակներին և քաղաքացիներին, ովքեր անտարբեր չգտնվեցին և համաձայնեցին ուսումնասիրեն սահմանադրական փոփոխությունները:

«Այս փոփոխությունները ծնվել են հասարակության մոտ առաջացած դժգոհությունները հաշվի առնելով: Այն մշակվել է մի հանձնախմբի կողմից, ովքեր պրոֆեսիոնալներ են, նրանց չի կարելի մեղադրել օրվա իշխանություններին ծառայելու մեջ: Նրանք այն մարդիկ են, ովքեր միշտ կողմ են եղել այս համակարգին: Այս փոփոխությունները մեր երկիրն այս վիճակից դուրս բերելու իրական հնարավորություն են ստեղծում: Մեզ մնում է մեր միասնականությամբ և մեր պայքարի արդյունքում հասնենք այն բանին, որ երկրում հաստատվի հիմնարար փոփոխություն»,- հայտարարեց Արծվիկ Մինասյանը:

Նարեկ Այվազյանը ևս շնորհակալություն հայտնեց նախագծի կազմակերպիչներին: «Սահմանադրական փոփոխությունների նախագիծը քաղաքացիների իրական պահանջմունքները չեն բավարարում. մարդու իրավունքներն ավելի են սահմանափակվում, ժողովրդավարությանը չի համապատասխանում, քանի որ պատգամավորներն իրավունք ունեն փոխել Սահմանադրությունն առանց հանրաքվեի, և վերջապես, սահմանադրության մեջ է դրվել ՀՀ տարածքային ամբողջականության հարցը՝ 205 հոդվածով»,- նշեց Նարեկ Այվազյանը՝ կոչ անելով «ոչ» ասել փոփոխություններին:

Վարդան Այվազյանն ասաց, թե առաջին անգամն է, որ ծրագրի միջոցով և այս ձևաչափով կարողացան ժողովրդի հետ շփվել և ներկայացնել իրենց կարծիքները:

«Ես «այո» եմ ասում, որովհետև այս նախագիծը միասնականության հնարավորություն է, և ցիտելով մեր մեծերին, պետք է ասեմ, որ մեր փրկությունը մեր միասնականության և հավաքական ուժի մեջ է»,-ասաց պատգամավորը:

Վարդան Խաչատրյանն էլ իր հերթին ասաց, թե «Այո և ոչ» իրապատման ձևաչափը մշակութային նոր երևույթ է և ցանկություն հայտնեց, որ այն զարգանա:

«Հայ ժողովրդի կարևագույն առանցքներն այս սահմանադրությամբ դրվել են հարվածի տակ, այդպիսիք են՝ ընտանիքը, Հայ առաքելական եկեղեցին և հայ ազգի ունեցած պետության ինքնիշխանության աստիճանը: Կարծում եմ, որ մեր ժողովուրդը պետք է ասի «ոչ» այս փոփոխությունների նախագծին»,-նշեց Վարդան Խաչատրյանը:

Միքայել Մելքումյանն ասաց, թե 25 տարվա մեջ առաջին անգամ հնարավորություն է տրվում «այո»-ն և «ոչ»-ը միասին ներկայացնելու:

«Մենք պետք է այս ճանապարհով անպայման անցնենք, և կարծում եմ՝ ժամանակն է, որ մեր հասարակությունը դուրս գա այս երկփեղկված վիճակից: Ինչպես արցախյան շարժման ժամանակ, մենք պետք է մի քանի գաղափարների շուրջ համախմբվենք և ցույց տանք, որ կարելի է մի քանի պարզ քայլերով դուրս գալ այս վիճակից»,-հայտարարեց Միքայել Մելքումյանը:

Արմեն Մկրտչյանն էլ բնակչությանը կոչ արեց հանրաքվեի օրն անպայման գնալ տեղամաս: «Կուզեք փչացրեք ձեր թերթիկը, կուզեք «ոչ» քվեարկեք, բայց անպայման մասնակցեք հանրաքվեին»,- ասաց Արմեն Մկրտչյանը:

Մարգարիտ Եսայանը շնորհակալություն հայտնեց հասարակությանը, ովքեր համբերատար լսել են իրենց քարոզարշավի ընթացքում:

«Մենք այս ամբողջ իրապատումն իրականացնում ենք նրա համար, որ մեր հասարակությունը քաղաքական, հասարակական գործիչներին տեսնի, լսի և ինքնուրույն որոշում կայացնի: Կոչ եմ անում հասարակությանը ինքնուրույն կատարեն իրենց որոշումները»,-ասաց Մարգարիտ Եսայանը:

Ազատ Արշակյանը ևս ասաց, թե ժամանակն է համախմբվելու, համերաշխության ակցիաներ անելու, ապա հավելեց. «Մենք դա չարեցինք: Հանելով նախագահի ինստիտուտը՝ մենք մեր երկիրն աստիճանազրկում ենք, մեր ժողովուրդը կորցնում է ազատ, արդար ընտրություններ կատարելու իր իրավունքը»:

Արթուր Եղիազարյանն իր հերթին ասաց, որ իրապատումը սովորեցրեց տարբեր տեսակետներ ունենալ և կանգնել կողք-կողքի: «Ես կողմնակից եմ այս բարեփոխումներին, և ուզում եմ, որ իմ երեխաները մնան այս երկրում և շարունակել ապրել այս երկրում»,- ընդգծեց Արթուրն Եղիազարյանը:

Թամարա Գևորգյանի կարծիքով՝ ժամանակն է խոսքից գործի անցնելուն. «Ես «ոչ» եմ ասում հասարակությանը քամահրելուն, «ոչ» եմ ասում գաղափարական կուսակցությունների սակավության պարագայում խորհրդարանական կառավարմանը»,-նշեց Թամարա Գևորգյանը:

Կարինե Աճեմյանը հատուկ շնորհակալություն հայտնեց «Այո» թևի իր գործընկերներին, որ կարողացան իրենց խոսքը հասցնել ժողովրդին, հավելելով, թե «այո» են ասում սահմանադրական բարեփոխումներին և ապահով Հայաստանին:

Հրանտ Բագրատյանի խոսքով՝ պատմականորեն սխալ է արվում սահմանադրական փոփոխությունների իրականացումով: «Վաղը երնեկ ենք տալու այսօրվա վիճակին» ասաց նա:

Սամվել Ֆարմանյանի գնահատմամբ՝ ՀՀ-ն կանգնած է արմատական փոփոխությունների առաջ: «Այդ փոփոխություններին հասնելու ճանապարհը իշխանությունը և շատ այլ կուսակցություններ ընդդիմադիր դաշտից՝ տեսնում են սահմանադրական փոփոխությունների եղանակով: Այն Հայաստանին կարող է տանել զարգացման ժողովրդավարության ճանապարհով»- իր ամփոփիչ խոսքում ասաց Ֆարմանյանը:

Գուրգեն Եղիազարյանը ևս շնորհակալություն հայտնեց իրապատման կազմակերպիչներին, ասելով, թե առաջին անգամն է, որ երկու հակադիր խմբեր միասին ճանապարհորդեցին, մասնակցեցին բանավեճերի: