Արտգործնախարարը «բացում է փակագծերը»

Սահմանին լարվածության աճը Ադրբեջանն է սադրում, որը կապված է նախարարական հանդիպման հետ:

Այս մասին այսօր՝ դեկտեմբերի 4-ին, Բելգրադում ԵԱՀԿ երկրների արտգործնախարարների խորհրդի 22-րդ նիստի շրջանակներում, հայ լրագրողների հետ զրույցում ասել է Հայաստանի ԱԳ նախարար Էդվարդ Նալբանդյանը՝ պատասխանելով այս գիշեր Ադրբեջանի կողմից նախաձեռնված դիվերսիոն փորձի մասին հարցին:

«Բացեմ փակագծերը. Համանախագահների հետ հանդիպման ժամանակ ես նրանց նույնպես ասացի, որ ԵԱՀԿ բոլոր նախարարական հանդիպումների նախաշեմին ադրբեջանական կողմը նվազեցնում է լարվածությունը, որպեսզի հետո սադրանքների դիմի։ Միշտ ամեն դեկտեմբերին՝ ԵԱՀԿ արտգործնախարարների յուրաքանչյուր հանդիպումից առաջ, իրավիճակը կրկնվում է։ Իսկ հայտարարություն ընդունելուց հետո անմիջապես սկսվում է լարվածության աճը եւ Ադրբեջանի կողմի նոր սադրանքները։ Համանախագահները կոչ են անում զերծ մնալ ուժ կիրառելուց, գնալ խաղաղ ճանապարհով, իսկ սա այդ կոչերին ադրբեջանական կողմի տված «պատասխանն է»։

Մենք «այո» ենք ասում համանախագահների կոչերին, կրկնում ենք նորից՝ Հայաստանը հաստատում է բանակցային խաղաղ ճանապարհով կարգավորման գնալու իր պատրաստակամությունը, ինչպես որ կոչ են անում համանախագահներն ու միջազգային հանրությունը։ Ադրբեջանն իր պատասխանն է տալիս»,- հայտարարել է Էդվարդ Նալբանդյանը։