Արցախի պահապանները. տիկին Նարինեն ամուսնության տարեդարձը նշում է Շուշիում՝ մենակ. ամուսինն ու որդիները ռազմի դաշտում են

Մեկ ամիս առաջ թշնամու կողմից սանձազերծված պատերազմը շուրջ 90 հազար արցախցու դարձրեց տեղահանված: Շատերն ապաստանեցին Հայաստանի տարբեր մարզերում ու Երևանում, իսկ առավել խիզախները մնացին իբրև կենդանի վահաններ՝ հենց Արցախում:

Արցախի հողին կառչածներից մեկը Շուշիի բնակիչ տիկին Նարինե Գրիգորյանն է: Շուշիում նրան գրեթե բոլորն են ճանաչում, հատկապես մանկապարտեզ կամ դպրոց այցելող փոքրիկների ծնողները: Նարինեն տիպիկ արցախցի մանկավարժ է՝ գրագետ, հայրենասեր ու խիզախ: Հենց այդպիսի ոգով էլ փոքրիկներին է մեծացնում: Այսօր էլ նա մայրական հոգատարությամբ է պարուրում Շուշիում մնացած փոքրիկներին: 

Այսպես հայրենասիրությամբ էլ նա մեծացրել է նաև իր որդիներին: Այսօր տիկին Նարինեի ընտանիքը դառնում է 23 տարեկան, բայց այս նշանակալի օրը նա միայնակ է տոնում. ամուսինն ու երկու որդիները պահպանում են հայրենի հողի սահմանները, իսկ 2 փոքրիկները ապաստանել են Հայաստանում: 

NEWSPRESS.am-ի հետ զրույցում տիկինն ասում է, որ հոկտեմբերն առհասարակ իր կյանքում ամենանշանակալի ամիսն է, այս ամսին նա ծնվել է, ամուսնացել ու առաջին անգամ մայրացել: 

«Հիմա՝ այսօր, այս ու գալիք բոլոր օրերին, ամիսներին, տարիներին ուզածս ու խնդրածս միայն մի բան է՝ խաղաղություն: Ուզում եմ, որ վայրկյան առաջ պատերազմը դադարի ու Արցախի երկինքը մշտապես խաղաղ լինի: Այստեղ պետք է մեր փոքրիկները սովորեն, արարեն, ստեղծեն: Մենք արարող ազգ ենք, հայը արարող է և այդպիսին է եղել միշտ, որքան էլ փորձեն մեզ թուլացնել, քանդել, միևնույնն է՝ մենք ոտքի ենք կանգնելու ու անպայման շենացնելու ենք մեր երկիրը, յուրաքանչյուրս մեր տեղում: Հիմա միայն մեկ բան եմ ուզում, որ մեր հայրերը, ամուսիններն ու որդիները ժամ առաջ ողջ ու առողջ տուն դառնան»,- ասաց մեր զրուցակիցը:

Նա պատմեց, որ ամեն Աստծո օր լինում է Սուրբ Ամենափրկիչ Ղազանչեցոց եկեղեցում, աղոթում հայրենիքի պաշտպանների համար: 

«Այսօր իմ բոլոր առիթների համար իբրև նվեր ինձ միայն մեկ բան է պետք՝ խաղաղությունն ու մեր տղաների հաղթական վերադարձը: Ես հավատում եմ մեր տղերքի բազկի ուժին ու վստահ եմ՝ հաղթելու ենք»,- եզրափակեց մեր զրուցակիցը: 

Հեղ.՝ Աստղիկ Հովհաննիսյան