Հիշեցնեմ քաղաքական Երևանին` տարանջատման ամեն մի ծիլն այստեղ չափազանց սուր է ընկալվում. Մի´ արեք. Թևան Պողոսյանի հորդորն Արցախից

ՀՀ Նախագահ խորհրդական, քաղաքական գործիչ Թևան Պողոսյանը, ով պատերազմական այս օրերին գտնվում է Արցախում, ֆեյսբուքյան իր էջում միասնականության կոչ է արել պաշտոնական  Երևանին և հորդորել տարանջատումներ չանել։

«Բոլորիս ու ամեն մեկիս պատերազմը շարունակվում է։ Մի օր վերջապես խելքի կգանք ու որպես ժողովուրդ և հասարակություն հիմնավորապես կհասկանանք, որ չկա ամեն մեկ, եթե չկա բոլոր։

Մեծ հույս ունեմ, որ ինքնուրույն կհասկանանք։ Այստեղ այս օրերին տղաներն ու աղջիկները ինչ անում են, շնորհակալության համար չեն անում, բայց ես կասեմ շնորհակալություն բոլորին, ում գործը տեսել եմ։

Ոլորտները բազմազան են, այսօր հատուկ կնշեմ մեր զինվորների սխրանքներն ու կռվի ընթացքը տեղ հասցնողների մի մասին. Սուրեն, Գեղամ, Արման, Սամվել, Մասիս, Դավիթներ, Հրայր, Լիլիթ, Արթուր, Կարինա, ..., Վահրամ, Սամվել, Իրինա... բոլորի անունը չեմ կարող նշել, բայց բոլորիդ շնորհակալություն։

Իսկ իրականում այս ամենը նշում եմ, որ մեկ անգամ նորից վերաիմաստավորենք և ամեն վարկյան ինքներս մեզ ասենք՝ մենք միասին նոր ապագա պետք է կառուցենք։ Դուք էլ տեղեկատվական «մարտերի» գլադիատորներն եք։

Ես ձեր ցավը տանեմ. միշտ այդպես թիմային, իրար հանդեպ հոգատար, զոր ու գիշեր աշխատանքով լի լինեք՝ միասին ապրելու (դե էլի շատ մարդ ու ես էլ ձեր հետ այդ բարձր կուլտուրան էլ անպակաս։

Մեկ անգամ նորից հիշեցնեմ քաղաքական Երևանին, որ տարանջատման ամեն մի ծիլն այստեղ չափազանց սուր է ընկալվում։ Մի´ արեք, խնդրում և աղաչում եմ։ Սովորե´ք շնորհակալ լինել իրար ու նայել առաջ։ Արկերի տակ զարթնող Արցախը բոլորից միասնականություն է պահանջում ու պարտադրում, և նա ունի դրա իրավունքը»,֊ գրել է Թևան Պողոսյանը։