Ի՞նչ է խոստացել Գագիկ Ծառուկյանը Պալաչին

Վերջին շրջանում խիստ լարված քավոր-սանիկական Ծառուկյան-Պալաչ հարաբերությունները կարծես թե մտնում են նոր փուլ. հաշտեցման, խաղաղ գոյակցության, հետագայում՝ չի բացառվում նաև ջերմ ու սրտառուչ։

Տարածված տեղեկությունների համաձայն` «Քինգ դե լյուքս» ընկերության սեփականատեր Արթուր Հարությունյանը՝ Պալաչը, ում ընկերությունն իրականացնում է նաև Երևան-Աբովյան-Երևան ուղղությամբ ուղևորափոխադրումներ, առաջիկայում հետ կվերցնի իր դիմումը դատարանից, որի հիման վրա դատական հայց էր ներկայացվել Գագիկ Ծառուկյանին՝ նույն ուղղությամբ նրա կողմից շահագործվող բարեգործական երթուղիների դեմ։

Ի՞նչ է տեղի ունեցել։ Մի՞թե Աբովյանի քաղաքապետի ընտրություններում հասցված այդչափ ծանր «ապտակից» հետո Պալաչը որոշել է վերականգնել քավոր-սանիկական նախկինում եղած ջերմ ու բարեկամական հարաբերությունները։

Ի՞նչ է խոստացել Ծառուկյանը Պալաչին՝ փշրված հարաբերությունները վերականգնելու համար։

Ամենայն հավանականությամբ՝ խնդիրը ոչ այնքան նախկինին հասնելն է, այլ ուղղակի՝ ջրի երեսին մնալը։ Պալաչին այլ բան չի մնում, քան համակերպվել այն մտքի հետ, որ ստեղծված իրավիճակում իր համար առավել նպաստավոր է ոչ թե դեմ լինել՝ կորցնելով նաև ունեցածը, այլ խաղաղ գոյակցել՝ պահպանելով, հնարավորության դեպքում ավելացնելով, եղածը։
Այդ է վկայում այն փաստը, որ Աբովյանի ներքաղաքային ուղևորափոխադրումների համար անցկացվող մրցույթին մասնակցելու համար դիմած միակ կազմակերպությունը Պալաչին պատկանող «Քինգ դե լյուքս» ընկերությունն է։
Ուստի, դժվար չէ կռահել, որ Պալաչն իր այդ քայլով, փորձում է իր ձեռքում պահել ուղևորափոխադրումների ոլորտում ունեցած իր մասնաբաժինը, հնարավորության դեպքում՝ այն ընդլայնելով։