«ՀՀ». Անկախությունը պայքար է, աշխատանք ու հաղթանակներ

«ՀՀ» թերթը գրում է.

«1991 թվականի սեպտեմբերի 21-ին 20-րդ դարում երկրորդ անգամ հայ ժողովուրդը պատմական վճիռ կայացրեց՝ ինքնուրույն որոշել իր և իր երկրի ճակատագիրը: Այդ օրը հայ ժողովրդի զավակները դուրս եկան իրենց տներից «Այո» ասելու դարերով փայփայած նպատակին՝ անկախությանը: Այդ պատմական օրը քվեարկության գնաց ընտրական իրավունք ունեցող 2 մլն 56 հազար 792 մարդ՝ այդ իրավունքն ունեցողների 95.5 տոկոսը: Նրանց 99.58 տոկոսը քվեաթերթիկներում ընտրեց «Այո»-ն՝ կյանքի կոչելով սերունդների երազանքը:

Յուրաքանչյուր Սեպտեմբերի 21 անկախության անցած տարիներին հետադարձ հայացք գցելու, անցած ուղին գնահատելու, արժևորելու և ապագա քայլերն ուրվագծելու առիթ է: Ժամանակակից աշխարհում առաջամարտիկ են այն ժողովուրդները, որոնք ճիշտ են գնահատում սեփական մարդկային կապիտալի արժեքը՝ դրա հիման վրա կառուցելով զարգացման նոր պահանջներին ու մարտահրավերներին համապատասխանող պետականության տեսլականը: Ուժեղ և ամուր պետություն ստեղծելու անշեղ ուղին աշխարհաքաղաքական այս բարդ տարածաշրջանում այլընտրանք չունի, և Հայաստանը հաստատուն քայլերով գնում է առաջ»: