Արյան և 30 միլիոնի դառնությունը

Մարտի 1-ի գործի քննոթյունը մտնում է բեկումնային փուլ, որովհետև կամաց-կամաց բացահայտվում է այն, ինչի մասին ահազանգում էին իրավաբաններն այս գործի քննության առաջին օրվանից ի վեր։

Հիմա Մարտի 1-ի զոհերի հարազատները հրաժարվում են գնալ դատարան և մասնակցել դատական նիստերին, որովհետև իրենք էլ արդեն հասկացել են, որ գործ ունեն ֆարսի և ոչ թե սպանությունների բացահայտման հետ, հասկացել են, որ դարձել են շոուի մաս, ինչի համար իրենց վճարել են 30 մլն դրամ։

Այս ֆարսն ավելի ակնհայտ է դառնում, երբ հիշում ես, թե ո՞վ և ինչպե՞ս մեյդան բերեց Մարտի 1-ի գործը։ Իր քաղաքական կարիերայի համար Մարտի 1-ը որպես դիվիդենտ գործիք օգտագործող վարչապետ Նիկոլ Փաշինյանը հրապարակներից հայտարարեց, որ Մարտի 1-ի գործը բացահայտված է, հետո հարկատուների վճարած հարկերից որոշեց, որ պետք է Մարտի 1-ի զոհերի հարազատներին 30 միլիոն դրամ տա, որպես աջակցություն։

Իրականում աջակցություն էր դա, թե որպես դատարան գնալու և դատական նիստերի ժամանակ «Ռոբերտ մարդասպան» բղավելու կանխավճար, ցույց տվեց ժամանակը։ Այս ընտանիքները ժամանակին մեղադրվեցին իրենց որդիների արյունը 30 միլիոնով ծախելու մեջ. թողնենք դա՝ ամեն մարդ ինքն է որոշում ինչպես վարվել իր վշտի հետ։

Նրանք խոնարհաբար գնացին դատարան, բղավեցին անհրաժեշտ բառերը, ապահովեցին տեսարաններ ու հիմա հասկացել են, որ հայտնվել են անելանելի իրավիճակում, որովհետև պահաջում են բացահայտել 10 սպանություննեի հեղինակներին, ինչի ուղղությամբ որևէ քայլ չի արվել։

Հիմա որոշել են էլ մաս չկազմել այդ կրկեսին, ետ կանգնել այս խեղկատակությունից ու հրաժարվել դատական նիստեին մասնակցել։ Դարձյալ ամեն մարդու իրավունքն է՝ թողնենք իրենց՝ իրենց որոշումերի հետ. բայց որպես Հայաստանի Հանրապետության հպարտ հարկատու, իրավունք ունենք հարցնելու՝ իսկ որքանո՞վ են ճշմարիտ այն տեղեկությունները, որ դատարան չգնալու պատճառն այն է, որ Փաշինյանից նորից փող են պահանջել ու ստացել մերժում։

Կարող ենք հարցն այլ կերպ հնչեցնել նաև՝ իսկ եթե Փաշինյանը որոշի ևս 30-ական միլիոն դրամ հատկացնել զոհերի հարազատներին, պատրա՞ստ են ետ կանգնել իրենց այս քայլից ու նույն ոգով ներկայանալ դատական նիստերին։

Սրանք հարցեր են, որոնք իրավունք ունեն գոյություն ունենալ, քանի դեռ ոչ փող տվողը, ոչ էլ փող ստացողը չի բերել մի խելամիտ հիմնավորում՝ հանուն ինչի՞ 30 միլիոն ստացան Մարտի 1-ի զոհերի հարազատները և ոչ սահմանին հանուն հայրենիքի կյանքը տված զինվորների հարազատները։

NewsPress.am