Դիմորդը 20 միավորով ընդունվել է վճարովի համակարգ. իրավապաշտպան

Իրավապաշտպան, «Իրավական ուղի» ՀԿ համահիմնադիր, Արցախի նախկին ՄԻՊ Ռուբեն Մելիքյանը գրում է.

«Մեզ է դիմել մի դիմորդ, որը 1 քննությունից ստացել է առավելագույն՝ 20 միավոր, բայց ընդունվել է ոչ թե անվճար, այլ վճարովի համակարգով, քանի որ հավասար միավորների դեպքում հաշվի է առնվել «աստղանիշով» երկու առարկաների հանրագումարը, սակայն նա այդ աստղանիշերով առարկաները 11-րդ և 12-րդ դասարաններում չի ընտրել (կամընտրական են եղել՝ չի ընտրել), ուստի հաշվի են առել 10-րդ դասարանի գնահատականները:

Ընդ որում, եթե հաշվի առնվեր պետական ավարտական քննություններից միջին թվաբանականը (դրանք 12-րդ դասարանում են հանձնում), ապա դիմորդը վստահաբար կընդունվեր անվճար։ Հիմա հարց։ Դիմորդը 2020 թվականի ընթացքում էլ ի՞նչ պետք է աներ, որ ընդունվեր անվճար։

Այլ կերպ ասած՝ որքանո՞վ է իրավաչափ 2020 թվականին հաշվի առնել 2018 թվականի գնահատականները։ Եթե սխալ եմ տրամաբանում, գրեք - ես կրթական իրավունքի մասնագետ չեմ, ուղղակի իմ հասկանալով՝ եթե դիմորդը դիմելու տարում արել է առավելագույնը, նա չի կարող չստանալ առավելագույնը»։