«Մեր խնդրանքն է՝ մեզ ոտքի մի հանեք, աշխատանքի հանեք». ռեստորանների աշխատակիցները բողոքի ակցիա են անում (տեսանյութ)

Կառավարության դիմաց հավաքվել են ռեստորանների աշխատակիցներ, հանդիսավարներ, երաժիշտներ, երգիչներ, սպասարկող անձնակազմ։ Հանրային սննդի ոլորտի փորձագետ Աշոտ Բարսեղյանն ասաց, որ իրենք ցանկանում են դիմել կառավարությանը՝ միջոցառումների անցկացման թույլտվության հնարավարության հետ կապված։

««Մեր միակ պահանջն է հստակություն մտցնել արտակարգ դրության վերացման ժամկետների շուրջ, որովհետև բիզնեսը խորտակվում է, բոլորը ֆինանսական կորուստներ են կրում».-լրագրողների հետ զրույցում ասաց Աշոտ Բարսեղյանը: 

Նա նշեց, որ հանդիպում են ունեցել «Իմ քայլի» հետ, փոխանցել իրենց պահանջը, սակայն որևէ հստակություն չի մտցվել։

Նրա խոսքով, իրենք ակնկալում են տնտեսական բլոկի գործողությունների տրամադրում հանրությանը, ուզում են հասկանալ՝ կառավարության տնտեսական բլոկը բացի դիմակ կրելուց ինչ-որ գործողություններ պլանավորվո՞ւմ է, թե՞ ոչ։

«Մենք ուզում ենք լսենք՝ կոնկրետ երբ է վերանելու արտակարգ դրությունը, որպեսզի թույլատրվեն միջոցառումները»,- ասաց նա։

Ակցիայի մյուս մասնակիցներներից ոմանք էլ իրենց պահանջները գրավոր ներկայացրել են կառավարությանը, սակայն որևէ պատասխան չեն ստացել։

«Կոնկրետ հինգ ամիս ժողովուրդը սոված է, ոչ մեկին չի հետաքրքրում, թե ոնց են ապրում, ինչ են անում։ Թող կոնկրետ ասեն՝ այս օրն է բացվում, մենք էլ իմանանք, թե ինչ ենք անում։ Մոլերը բաց է, ջերմաչափում են, թողում են մտնել, թող ռեստորաններում էլ ջերմաչափեն, հյուրերին թողնեն, այս մարդիկ աշխատեն»,- ասաց ակցիայի մեկ այլ մասնակից։

Նրա խոսքով, հինգ ամսում մեկ անգամ 68 հազար դրամ են պետությունից որպես աջակցություն ստացել։

Նշում են, որ պետք է վճարեն լույսի, գազի, ջրի համար, բանկերում վարկեր ունեն, ամեն օր հաղորդագրություններ են ստանում՝ սա մուծենք, այն մուտեծք։

«Որտեղի՞ց մուծենք»,- հարցնում են ակցիայի մասնակիցները։

Ինչ վերաբերվում է առողջապահության նախարար Արսեն Թորոսյանի հորդորներին, ապա, ըստ նրանց, դրան ոչ ոք արդեն լուրջ չի վերաբերվում։

«Մեր խնդրանքն է՝ մեզ ոտքի մի հանեք, հանեք աշխատանքի»: