Գտած անձնագրով բանկերից վարկեր է վերցրել

ՀՀ քննչական կոմիտեի Երեւան քաղաքի Շենգավիթ վարչական շրջանի քննչական բաժնում ավարտվել է կեղծ փաստաթղթերի օգտագործմամբ ուրիշի անունով վարկեր ձեւակերպելու եւ ստացված գումարը հափշտակելու դեպքի առթիվ հարուցված քրեական գործի նախաքննությունը:

ՀՀ Քննչական կոմիտեից հայտնում են, որ նախնական քննության տվյալներով՝ Երեւանի 48-ամյա բնակչուհին «Կոմիտասի» անվան պանթեոնում գտել է ՀՀ քաղաքացի հանդիսացող մի կնոջ անձնագիր, որն օգտագործելով կատարել է հափշտակություններ։ Մասնավորապես՝ անձնագրում նշված կնոջ անվամբ ձեռք է բերել աշխատանքի վերաբերյալ կեղծ տեղեկանք, որը գտած անձնագրի հետ միասին 2014 թ. մայիս-հունիս ամիսներին ներկայացրել է հանրապետությունում գործող տարբեր բանկեր եւ անձնագրում նշված կնոջ անունով ձեւակերպել սպառողական վարկեր, իսկ ստացված գումարները՝ հափշտակել։ Նախաքննությամբ բացահայտվել է նման մեխանիզմով իրականացված խարդախության 4 դրվագ։

Բացի այդ, պարզվել է, որ գտած նույն անձնագրով կապի օպերատորներից մեկի հետ 48-ամյա բնակչուհու կողմից կնքվել է բջջային հեռոխոսի եւ բջջային հեռախոսաքարտի ձեռքբերման պայմանագիր։

Մինչդատական վարույթում ձեռք բերված ապացույցների հիման վրա 48-ամյա բնակչուհի Ն. Խաչատրյանին մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով (4 դրվագ) ( Խաբեության կամ վստահությունը չարաշահելու եղանակով ուրիշի գույքի զգալի չափերով հափշտակությունը կամ ուրիշի գույքի նկատմամբ իրավունք ձեռք բերելը), 325-րդ հոդվածի 1-ին մասով (Իրավունք վերապահող կամ պատասխանատվությունից ազատող վկայական կամ պաշտոնական այլ փաստաթուղթ կեղծելը), 178-րդ հոդվածի 2-րդ մասի 2-րդ կետով ( խաբեության կամ վստահությունը չարաշահելու եղանակով ուրիշի գույքի խոշոր չափերով հափշտակությունը կամ ուրիշի գույքի նկատմամբ իրավունք ձեռք բերելը)՝:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: Մեղադրական եզրակացությունը հաստատվել է, եւ գործն ուղարկվել դատարան։